Nivîskar Azîz Tûnç qonaxa heyî ya “Pêvajoya Aştî û Civaka Demokratîk” nirxand û diyar kir ku pêvajo li gel xitimandin û astengiyan jî dimeşe. Azîz Tûnç destnîşan kir ku pirsgirêka bingehîn a li pêşiya pêvajoyê ew e ku pirsgirêka Kurd li navenda çareseriyê nayê bicihkirin.
Tûnç anî ziman ku nêzîkatiya dewletê ku meseleyê bi giranî li gorî çekdanînê dinirxîne, dikare bibe sedem ku pêvajo bixitime û ragihand ku danîna çekan bi tena serê xwe nikare pirsgirêka Kurd ji holê rake. Nivîskar Azîz Tûnç bi bîr xist ku pirsgirêka Kurd beriya têkoşîna çekdarî jî hebû û got, n abe ku çareseriya pirsgirêkê tenê li ser esasî jiholêrakirina çekan bê nirxandin.
Azîz Tûnç diyar kir ku divê pêvajo tenê ji înîsiyatîfa dewletê re neyê hiştin, hemû beşên civakê li gel daxwazên xwe xwedî li daxwazên Kurdan jî derkevin û axaftina xwe bi vî rengî dewam kir:
“Nêzîkatiya dewletê ku li gorî berjerwendiyên xwe hewl dide pêvajoyê sînordar bike, fikarên civakî zêde dike. Polîtîkayên herêmî yên dewletê jî bandorê li rêveçûna vê pêvajoyê dike. Nêzîkatiyeke welê heye ku dibêje, hebûna polîtîk û rêxistinî ya Kurdan li hesabên herêmî yên dewletê nayê. Ji ber vê yekê jî hêzên demokrasiyê yên li Tirkiyeyê divê bi rengekî hîn çalak beşdarî pêvajoyê bibin.
Hemû beşên civakê li gel daxwazên xwe divê daxwazên Kurdan jî biparêzin. Kurd ji xwe daxwazên Elewiyan, karker, ciwan û jinan diparêzin. Beşên din ên civakî jî li gel parastina daxwazên xwe divê daxwazên Kurdan jî bi hev re biparêzin.
Me berê dît ku dema civak bi têrkerî û xurtî xwedî li pêvajoyê dernekeve wê encameke çawa bi xwe re bîne. Bûyerên ku berê qewimîn divê dubare nebin. Astengiyên cuda, agahiyên çewt ên cuda derdixin pêşiya civakê. Li hemberî vê yekê divê hişyariya civakî bê zêdekirin. Ev jî sendîka ne, partî ne, sazî ne. Divê hemû saziyên demokratîk, beşên civakî dakevin qadê û daxwazên Kurdan bi hev re biparêzin. Dema ku daxwazên xwe kirin, divê daxwazên Kurdan jî bikin.”
Nivîskar Azîz Tûnç diyar kir ku pêvajo bi hewldana derdorekê nameşe û got, “Kurdan di vê demê de fedakariyên girîng kirin. Gotin ku dest ji têkoşîna çekdarî berdane û çek şewitandin. Ji bo pêvajoya ji niha û pê ve bi ser bikeve wê hewldanên xwe dewam bikin. Lê belê divê beşên civakî hîn bi xurtî beşdarî pêvajoyê bibin.
Eger tê xwestin ku Pêvajoya Aştî û Civaka Demokratîk bê navber dewam bike, girîng e hemû beşên civakê hîn bi çalak tevbigerin. Tecrûbeyên berê nîşanî me dan ku israra li ser aştî û cpêvajoya civaka demokratîk, meşandina pêvajoyê bi piştgiriya hêzeke civakî tê wê wateyê ku pêvajo ji însafa dewletê re neyê hiştin. Ji ber ku pêvajoya heyî ewqasî bi wate û hêja ye ku nabe ji însafa dewletê re bê hiştin.”
