Piştî êrîşên li ser dibistanan li Riha û Mereşê, xebatkarên perwerdehiyê dest bi greveke sê rojan kirin û daxwaz kirin ku Wezîrê Perwerdeyê îstifa bike. Nûnerên Eğitim-Sen, destnîşan kirin ku êrîş ne kiryarên takekesî ne, girêdayî sîstemê ne.
Serokê Şaxa Egîtîm Sen a Stenbolê Hanifi Bayindir got, “Tê xwestin nifşekî bindest mezin bikin, ne yên ku lêgerînên wan heyî.”
Bayindir, destnîşan kir ku krîza aborî, newekhevî û polîtîkayên perwerdehiyê tundûtûjî zêde kiriye û diyar kir ku pergala perwerdehiyê ji bingehên xwe yên laîk, zanistî û demokratîk dûr ketiye.
Bayindir, got ku tundûtûjî tenê bi rêzefîlmên TV an jî sedemên takekesî nayê ravekirin û got, “Zext, bêdengkirin û qalibkirin di dawiyê de rê li ber teqînê vedike.”
Bayindir, diyar kir ku divê Wezîrê Perwerdeyê berpirsiyariyê bigire ser milên xwe û got, “Divê ne wefa, liyaqet esas were girtin.”
Mamosteyan, her wiha gotin ku bûyer ne bûyerên takekesî ne, encama polîtîkayên perwerdehiyê yên bi salan kombûyî ne. Mamosteyekî got, “Ev pirsgirêkek a sîstemê ye.”
Mamosteyan, destnîşankirin ku zarokên ku di warê aborî de zehmetiyan dikişînin, bêtir rastî tundûtûjiyê tên. Hate diyarkirin ku pergala perwerdehiyê siyasî bûye û pêşveçûna lêgerîna kesan tê astengkirin.
Mamosteyekî din jî, diyar kir ku ekran û naveroka tundûtûj bandorê li zarokan dike û got, “Li her derê tundûtûjî heye.”
Karmendên perwerdehiyê, ragihandin ku heta ku tedbîr neyên girtin, ew ê çalakiyên xwe bidomînin.
