Di Newroza Wanê de ku bi dirûşmeya “Newroza Azadî û Demokrasiyê” û “Newroza Azadî û Yekîtiya Demokratîk” hat lidarxistin û bi sed hezaran kes beşdar bûn, piştî Koma Rojhilat, Kevser Akçelîkê peyama Rêber Apo xwend ku doh di Newroza Amedê de hat ragihandin.
Paşê Veysî Aktaş axivî. Veysî Aktaş diyar kir ku encamên hilbijartina herêmî ya 2024’an a Wanê li Îmraliyê ji aliyê Rêber Apo ve weke encameke “dîrokî” hatiye nirxandin. Aktaş bal kişand ser bandora hilbijartinên herêmî ya 14 şaredariyên ku li Wanê bi dest ketin û got ku encam bi vîna rêxistinkirî ya gel bi dest ketiye. Aktaş got “Gelê Wanê gotina dawî got” û bilêv kir ku tevî zextan jî gel vîna xwe parastiye. Aktaş bal kişand ser rola jin û ciwanan a di têkoşînê de û got, ev dînamîzim diyarker bûye.
Aktaş bal kişand ser Pêvajoya Aştî û Civaka Demokratîk ku Abdullah Ocalan da destpêkirin û got ku çareserî bi rêbazên diyalog û aştiyane pêkan e û komara demokratik bingeha wekhevî, azadî û edaletê ye.
Aktaş di axaftina xwe de destnîşan kir ku rêbaza danûstandina demokratik eger di navbera aliyan de wekî rêbaza bingehîn hatibe diyarkirin, nexwe divê alî xwedî şert û mercên wekhev bin û got: “Pêdivî ye ku statuya cihê ku Rêberê Gelê Kurd birêz Abdullah Ocalan lê bimîne bê diyarkirin. Divê dewlet û desthilat zû tevbigerin da ku şert û mercên Serokatî ji bo danûstandinên demokratîk guncaw bin.”
Aktaş destnîşan kir ku di rewşa heyî de aştî ji bo wan tenê ne armancek e, têkoşîna gel bixwe ye û got: “Têkoşîna li dijî netewprestiya ku gelan bera hev dide.”
Aktaş di dawiya axaftina xwe de hemû beşdaran silav kir û got ku wekî di hilbijartinên herêmî de hemû gel vedixwîne xwedîderketina li berprisiyariyan.
Piştî axaftina Aktaş, girseyê bênavber dirûşmeya “Bijî Serok Apo” berz kir.
