Heyeta Îmraliyê ya Partiya Demokrasî û Wekheviyê ya Gelan (DEM Partî) piştî ku hevdîtina ku îro bi Rêber Apo re kir, wê bangê ji raya giştî re ragihîne.
Daxuyanî wê li bajarên Amed û Wanê yên Bakurê Kurdistanê ji ekranên mezin bê temaşekirin.
Beriya daxuyaniyê, li Qada Şêx Seîd a Amedê amadekarî dewam dikin.
Ji gelek bajar û navçeyên Kurdistanê ji her temenî mirov bi kelecan li benda peyamê ne.
‘EM BI KELECAN LI BENDA PEYAMÊ NE’
Amediyên ku bi kelecan li benda peyamê ne ji ANF’ê re axivîn.
Rojhat Akin: Li vî welatî 40 sal in şer heye. Herdu aliyan berdêlên gelekî giran dan. Pêwîstiya tevahiya gelên Tirkiyeyê bi peyameke bi vî rengî heye. Li nava tevahiya gel kelecaneke cidî heye. Em bi kelecan li benda peyamê ne. Bendewariyeke mezin heye. Divê her kes guh bide banga Rêbertî. Aştî wê bê vî welatî. Em bi kelecan in. Em bi hesreta Rêberê xwe ne.
‘EM JI RÊBERÊ XWE BAWER DIKIN’
Ahmet Benlî: Ez sibehê zû ji Cizîrê hatim. Bi kelecan û hêvî me. Em ê hemû şahidî ji vê kêliya dîrokî re bikin. Weke gelê Kurd em ji Rêberê xwe bawer dikin. Em li benda peyama Rêberê xwe ne. Hêvîdarim ji bo gel wê bibe bingeha aştiyeke bi rûmet.
COŞA ME GELEKÎ MEZIN E
Narîn Gezgor: Bêguman piştî bi salan wê ji Birêz Ocalan peyameke bi vî rengî ya dîrokî bê. Ji ber vê yekê kelecan û coşeke mezin heye. Em hemû li benda peyama Birêz Ocalan in.
