Bi dehan şêniyên herêma Benî Zeyd a taxa Eşrefiyê ya Helebê li kolaneke sereke ya taxê kom bûn û bi daxuyaniyekê bang li hikumeta veguhêz kir ku dorpêça li ser Şêxmeqsûd û Eşrefiyê rakin û binpêkirinên li dijî şêniyan bi dawî bikin. Daxuyanî ji aliylê endamê Komîna Benî Zeyd Omer El Başî ve hat xwendin.
Di daxuyaniyê de hate gotin, di demekê de ku pêkhateyên Sûriyeyê li hêviya aştî û ewlehiyê ne, êriş û dorpêç li ser taxên Şêxmeqsûd û Eşrefiyê çêdibin. Di daxuyaniyê de îşaret pê hat kirin ku hêzên hikumeta veguhêz a Sûriyeyê û komên girêdayî wê bê hincet êrişî her du taxan dikin û binpêkirinan li dijî şêniyan pêk tînin.
Di daxuyaniyê de bal kişand ser peymana ku 1’ê Nîsanê di navbera Meclisa Giştî ya Taxên Eşrefiyê û Şêxmeqsûdê û hikumeta veguhêz de hatibû îmzekirin û hate gotin, hikumeta veguhêz berpirsyariyên xwe li hemberî şêniyên her du taxan bi cih nayîne, di heman demê de veguhestina ewle ya şêniyan di navbera bajarê Helebê û gelemperiya Sûriyeyê naparêze.
Di daxuyaniyê de hate destnîşankirin ku komên çekdar di demên dawîn de binpêkirinên diyar li dijî sivîlên her du taxan kirin û ji 24 rojan ve ambargo danîne ser her du taxên di serdema rejîma Baas’ê de pêkhateyên Sûriyeyê hembêz kir û bibû modela jiyana hevbeş, rûmet û berxwedana sivîl. Di dewama daxuyaniyê de hate gotin, armanca ambargoyê şikandina îradeya civaka hevgirtî ye ya ku di azadiya xwe de bi israr e.
Di dewama daxuyaniyê de îşaret pê hat kirin ku tevî ragihandina agirbestê jî, lê li bendên derdora her du taxan û devera Benî Zeyd dewam dikin. Hate aşkerakirin ku ev binpêkirin ji aliyê komên ne rêxistinkirî yên desteka xwe ji hikumeta Tirk digirin ve têne kirin.
Di daxuyaniyê de ambargoya ku hikumeta veguhêz ferz kiriye û binpêkirinên li dijî sivîlan û revandina wan hatin şermezarkirin. Her wiha hate diyarkirin ku ev kiriyar ne binpêkirinên ferdî ne, lê siyaseteke sîstematîk e jiyana şêniyan dixe xetereyê û pêvajoya siyasî ya aramkirinê lawaz dikin.
Di daxuyaniyê de piştgirî bi Hêzên Ewlekariya Hundirîn û şêniyên her du taxan hate destnîşankirin. Bang li hikumta veguhêz jî hat kirin ku berpirsyarên xwe li hemberî şêniyên Şêxmeqsûd, Eşrefiyê û Benî Zeyd bi cih bînin. Hate gotin ev taxek beşek ji erdîngariya Helebê ne, dem hatiye ku ew jî bi aştî û ewlehî bijîn.
Her wiha bang li hikumeta veguhêz hat kirin ku tavilê ambargoya li ser her du taxan rake, bihêlin madeyên sereke, sotemenî û derman derbas bibin, êriş û binpêkirinên li dijî sivîlan rawestînin, bendên axî rakin û hesab ji berpirsên van binpêkirinan bipirsin.
