Xelkê Wargeha Penaberan a Şehîd Rustem Cûdî (Mexmûr) ev êrîş bi mitîngekê şermezar kirin. Mitîng li Navenda Çand û Hunerê bi tevlîbûna dehan xelkê wargehê pêkhat beriya ku axaftin were kirin, di kesayeya şehîdên Helebê de ji bo tevahî şehîdên Kurdistanê deqeyek rêz hat girtin.
Piştî rêzgitinê axaftinek ji aliyê Hevserokê Dîwana Meclîsa Gel a Mexmûrê Elî Bilehî ve hat kirin.
Elî Bilehî di destpêka axaftinên xwe de Şehîdên Şoreşa Rojava û hemû cangoriyên azadiyê bi bîr anî û wiha got: “Em dizanin destkeftiyên ku li Rojava hatine bi destxistin hemû jî bi xwîna şehîdan û bi kedek mezin hatin bidestxistin. Lê em dizanin çawan hêzên hegemon li hev kombûn û komplo li dijî Rêbertiya me dan destpêkirin û Rêbertiya me radestî dewleta Tirk kirin, heman hêz dîsa li Fransa kombûn û li ser destkeftiyên Rojavayê Kurdan biryar dan û dest bi êrişên xwe yên hovane kirin. Heman hêz bûn DAÎŞ avakirin. Beredewamiya komployê ya ku ji serê salê ve li ser taxên Şêxmeqsûd û Eşrefiye hatî destpêkirin, niha belavî tevahî Rojavayê Kurdistanê bûye. Lê em vêya dizanin, çawan ku Rêber Apo dest bi vê şoreşê kir û li himberî du xetan helwest da û têkoşîn da meşandin yek jê li beranberî sîstema kapîtalîst şer da destpêkirin û ya din jî li dijî xeta xiyanetê têkoşîn da meşandin. Yên ku îro êrişî destkeftiyên Kurdan dikin, yên serkêşiya herdu xetan dikine. Me di êrişên li ser Rojava de dît, ji derveyî çiyayên Kurdistanê piştevaniya Kurdan nîne û ji derveyî Kurdan dostên Kurdan nîne. Ji bo vê jî ya ku ji gelê Kurd tê xwestin li beranberî vê faşîzm û bêmafiyê yekrêzî ye. Em heta dawî bi gelê Rojava re ne.”
Piştî axaftinê mitîng bi dirûşmeyên ‘Bijî Serok Apo’, ‘Bijî Berxwedana Rojava’ bi dawî bû.
