Înîsiyatîfa Gel a Bajarê Qamişloyê ji bo azadiya fîzîkî ya Rêber Apo li bajarê Qamişloyê bi dirûşma “Dem dema azadiya Rêber Apo ye” meşek lidar xist.
Meşê ji Çerxerêya Sonî ya bajêr bi tevlêbûna bi hezaran kesî ji şêniyên Qamişlo, Tirbespiyê, Amûdê û Til Hemîs destpê kir.
Meşvanan pankarta “Rêber Ocalan sembola aştî û heqîqeta mirovatiyê ye” û wêneyên Rêber Apo rakirin.
Di dawiya meşê de li Çerxerêya Şehîdên Qamişloyê (Sebee Behrat) mîtîngek hate lidarxistin. Di mîtîngê de li ser navê Kongra Star Hevseroka Tevgera Civaka Demokratîk (TEV-DEM) Remziya Mihemed axivî û da zanîn ku Rêber Apo her tim ji bo gelên bindest banga aştî û aramiyê kiriye û ji bo wê jî têkoşiya ye. Remziya Mihemed bi dewamî got, “Eger banga Rêbertî derneketa em ê niha di nava rewşeke aloz û şereke ji niha aloztir de bana. Bi banga ‘Aştî û Civaka Demokratîk’ Rêber Apo sîstem û bernameyên tevahî cîhanê da guherandin.”
Di mîtîngê de endamê Înîsiyatîfa Gel a Bajarê Qamişloyê û endamê Rêveberiya Kongra Îslama Demokratîk Ebdulkerîm Sarûxan jî axivî û destnîşan kir ku Rêber Apo bi fikra xwe azad e û ew jî bi hacetî azadiya wî ya fîzîkî ne.
Ebdulkerîm Sarûxan diyar kir ku felsefeya Rêber Apo ji bo civakan rêya çareseriyê ye û wiha anî ziman: “Aqûbeta gelan girêdayî Rêber Abdullah Ocalan e, dema azadiya fîzîkî ya Rêbertî pêk nayînin, wê demê divê em bizanin hêzên navneteweyî hîn kiryarên xwe yên li dijî gelê Kurd berdewam dike. Rizgariya herêm û gel girêdayî azadiya Rêbertî ye, lewma divê bi hevgirtin em têkoşîna xwe bidomînin.”
Mîtîng bi dirûşmên “Bijî Serok Apo” û “Bijî Berxwedana Îmraliyê” bi dawî bû.
