Xelkê Şemzînanê êrîşên li ser Rojava şermezar kir

Êrîşên li ser Bakur û Rojhilatê Sûriyeyê, li navçeya Şemzînan a Colemêrgê bi meşekê hate protestokirin. Meş, bi pêşengtiya Platforma Saziyên Demokratîk hat lidarxistin. Girseya ku li pêşiya avahiya DEM Partiyê ya Şemzînanê li hev civiya, ji ver heta Cadeya Cumhuriyetê meşiya. Di meşê de dirûşmên “Bijî berxwedana Rojava”, “Bijî berxwedana QSD’ê” û “Bijî berxwedana gelê Kurd” hatin berzkirin. Her wiha pankarta “Xwedîderketina li Rojava, xwedîderketina li mirovahiyê ye” hate hilgirtin. 
 
Piştî meşê, daxuyanî hate dayin. Daxuyanî, ji hêla Hevserokê DBP’a Şemzînanê Senar Duyan ve hate xwendin. Duyan, anî ziman ku êrîşên bênavber ên li dijî Rojava sûcekî li dijî mirovahiyê ye û got: “Bi awayekî sîstematîk hedefgirtina qadên jîngehan, binpêkirina mafê jiyanê ye û dixwazin Rojava veguherînin qada şer. Îktîdara HTŞ’ê ku nikare komên cîhadîst kontrol bike, ne xwedî wê hesta însanî ye ku bikare rê li ber êrîşên ser nasnameyên etnîkî û olî yên li welat bigire. êrîşên HTŞ’ê û cîhadîstên çete yên girêdayî wê, qadên sivîlan bombebaran dikin, bi darê zorê wan koçber dikin û mal û milkê wan talan dikin. Bi vê yekê re jî hiqûqa navneteweyî û hemû peymanên navdewletî binpê dikin û sûcê şer dikin.” 
 
Parlamenterê Colemêrgê Vezîr Coşkun Parlak jî got: “Bila Tirkiye û çeteyên girêdayî wê baş bizanin ku dê Rojava nekeve. Zarok û kal kuştin, ew zarokên me bûn. Em van polîtîkayên Tirkiyeyê şermezar dikin. Hewl didin pêvajoya birêz Ocalan daye destpêkirin sabote bikin. Berxwedana li Kobanê hêj îro jî didome. Em van êrîşan şermezar dikin. Em neviyên Şêx Seîd û Seyîd Riza ne. Li her çar parçeyên Kurdistanê şer ragihandine. Ji bîr nekin ku yên piştgiriyê didin çeteyan AKP ye.”