‘Înîsiyatîfa Azadiya Rêber Apo’ di çarçoveya pêngava ‘Ez dixwazim hevdîtinê bi Rêber Apo re bikim’ dest bi komkirina îmzeyan kir. Îmze ji akademîsyen, parêzer, bijîşk, endamên partiyên siyasî, rewşenbîr û nivîskar, oldar, şêxên eşîran, hiqûqnas û hemû qadên zanistî û perwerdeyê yên civakê tên komkirin ku bi vê şêwazê daxwaz tê kirin ku bi Rêber Apo re hevdîtinê bikin.
Têkildarî vê Berdevkê ‘Înîsiyatîfa Sûriyeyê ya Azadiya Rêber Apo’ Bekir Ceradê ji ANF’ê re axivî û diyar kir ku Rêber Apo çareseriye ji qeyranên li Rojhilata Navîn re dibîne.
Bekir anî ziman ku di çarçoveya pêngava ‘Ez dixwazim Rêber Apo bibînim’ ew îmzeyan kom dikin û got, “Wê ji qadên civakê û kesayetên xwedî zanist îmze bên komkirin. Daxwaza me jî ew e ku em Rêber Apo êdî bibînin. Banga Rêber Apo bi bandor li tevahiya cîhanê kir. Lewma gel û azadîxwaz di wê hêviyê de ne ku êdî Rêber Apo bibînin. Em jî dixwazin destê Rêberê xwe bi hêz bikin.”
Bekir Ceradê diyar kir ku Rêber Apo kilîta çareseriyê û hêviya paşerojeke azad e û got, “Divê em êdî dawî li siyasetên şaş û komkujiyan bînin. Êdî em jiyaneke azad bi azadiya fîzîkî ya Rêber Apo bi jiyaneke azad pêk bînin. Em êdî dixwazin Rêber Apo bibînin. Divê em her kes êdî bi rol û mîsyonên xwe rabin, her kes yên pêşengên vî gelî divê tevlî pêngavê bibin. Hîna pêngava me dewam dike. Wê bi hezaran jî dengê xwe bidin û îmzeyan bidin.”
Ceradê bi vî rengî dewam kir, “Li her derê hestê hezkirin û hêviyê hene, hestên dîtina Rêber Apo heye. Êdî em fîzîkî Rêber Apo di nava xwe de dixwazin. Rêber Apo çareseriyê ji vê qeyran û kaosa li Rojhilata Navîn dibîne. Ji lewra her kes bi hezkirin û hêviyekê îmze dike. Êdî Rêber Apo bi rengekî fîzîkî demildest em di nava xwe de dixwazin.”
Hêjayî gotinê ye ku heta niha jî li seranserê herêmê pêngav dewam dike. Wê ev îmzeyên bên komkirin ji Neteweyên Yekbûyî, CPT û wê ji Wezareta Edaletê ya Tirkiyeyê re bêne şandin.
