Welatê me îro ji her demê zêdetir di nava berxwedaneke mezin û biwate de ye. Dibêjin berxwedan rêya serketinê ye, lê bêyî serketin bêyî berdêl nabe. Eger tu hebî, divê tu bibî şervan û çeka xwe bigirî; ji ber ku eger welatê te dîlgirtî be, hêrs û nefret têrê nake. Xeyalên te wê ewqasê mezin bin ku tu dê her tiştî li pey xwe bihêlî û xwe bexşî şer bikî. Jixwe ji dervey wê tu dê çawa di nava rehetiyê de jiyana xwe dewam bikî? Eger şer û komkujî hebe, jiyan bêwate dimîne. Lewma her ciwanekî Kurdistanê, azadiya welatê xwe yê pîroz dixwaze. Bêyî welatekî azad ne nefes standin, ne jî jiyaneke bi rûmet ne pêkan e.
Mesken Nisêbîn jî êşa welatê xwe hîs kir û dema ev yek ferq kir, berê xwe da jiyana rast. Zeynep Kaya di nava tevgerê de bi navê Mesken Nisêbîn tê naskirin û ji navçeya Nisêbîn a Mêrdînê ye. Zeynep a ku li Mêrdînê ji dayik dibe, di nava malbateke welatparêz de mezin dibe. Tevlîbûn û şehadetên di nava malbata wê de, karakter û armanca wê diyar dike. Zeynep hîna di zarokatiyê de êş û zehmetiyên welatê xwe dijî. Mîna her zarokek Kurd bi zextan re mezin dibe û lewma demildest dikeve ser rêya şervan û şoreşgeriyê. Hingî ku mezin dibe, êdî ti kes li ber xwesteka wê nasekine. Ji ber ku şehadetên di nava malbata wê de jê re dibin astengiyek. Lê belê jiyana ku sîstemê lê ferz kirî, qebûl nake. Bi biryardariyeke mezin, dixwaze tevlî nafa refên azadiyê bibe.
Di sala 2015’an de ji bo bigihije xeyala xwe ya jiyaneke azad û bi rûmet, bi rê dikeve. Cil û bergên gerîla li xwe dike, çeka xwe dihilgire û berê xwe dide çiyayan. Navê Mesken Nisêbîn digire û dest bi rêwîtiya xwe ya şoreşê dike. Bi perwerdeyên wergirtî re, timî mezin dibe û pêş dikeve. Ji jiyan heta şer berpirsyartiya her tiştî digire. Ji perwerdeyên teorîk hîn wêdetir, têkoşîna wê ya pratîkî jî bi lez mezin dibe û tecrube bi dest dixe. Destpêkê li herêma Avaşîn pratîk dimeşîne. Şer çiqasê zehmet be bila bibe, gerîla Mesken pêdiviya fêrbûna her cure çekê ferq dike. Lewma, ji bo derbeyên hîn xurttir li dijmin bixe û çalakiyên bi bandor lidar bixe, berê xwe dide perwerdeya çekên giran. Di vê pêvajoyê de hewldaneke zêde dide. Êdî berpirsyariya wê hîn girantir e. Lewma bi hemû hêza xwe ji bo hevrêyên xwe têdikoşe û li ser esasê nirxên partiyê xwe pêş dixe.
EGER ŞER HEBE, FEDAKARÎ JÎ HEYE
Eger şer hebe, fedakarî jî heye û Mesken di refên herî pêş ên şer de bi roleke aktîf radibe. Li Kurdistanê şerekî mezin hebû, bi taybetî her roj li dijî çiyayên azad êrîşên nû pêk dihatin û berdêlên pir giran hatin dayîn. Gerîla Mesken di vê pêvajoyê de berê xwe dide çeperê şerê giran. Li Herêmên Parastinê yên Medyayê stratejiya şer çêdike. Di gelek çalakiyên li dijî dijmin hatin kirin de, rolên krîtîk û berpirsyariyên mezin digire ser xwe û pêşengiyê ji hevrêyên xwe re dike. Tecrubeyên ku di vê pêvajoya şer de bi dest xistî, wê digihîne serketinên mezin. Piştî têkoşîna xwe ya di salên 2022-2023’yan de, derbasî Akademiya Şehîd Bêrîtan dibe. Di vê akademiya leşkerî de bi taybetî li ser fermandarî û zanebûna partiyê xwe pêş dixe. Di tevahiya perwerdeyê de ji pêvajoyên rexne û rexnedayînê derbas dibe û tecrube qezenc dike.
Êdî Mesken bi nasnameya jina azad weke fermandarekê wezîfe digire ser xwe, diçe qadên têkoşînê û di refên pêş de şer dike. Gerîla Mesken diçe çeperê berxwedanê Metînayê û têkoşîna xwe didomîne. Li dijî êrîşên dagirkeriyê yên dijmin ên li ser Metînayê, dibe xwedî hêrseke mezin. Lewma bi israr dixwaze bibe parçeyek vê berxwedanê. Gerîlayên leheng li dijî êrîşên li ser çiyayên azad her roj berxwedaneke destanî raber dikin û têkoşîna xwe hîn mezintir dikin. Çalakiyên gerîla derbeyeke mezin li dijmin dixin. Gerîla Mesken jî di nava şer de bi hevrêyên xwe re mil bi mil, li Metînayê stranên azadiyê digot. Dirûşmeya ‘Berxwedan Jiyan e’ bi dengê Mesken û hevrêyên wê dihat berzkirin. Gerîlayên Azadiya Kurdistanê ji bo serketinê veguherîne destkeftiyên mezin, têdikoşin.
Hingî ku şer dewam kir, dilên leheng jî derketin holê. Dijmin jî li hemberî berxwedana gerîla bêçare dimîne û ti encamê bi dest naxe. Gerîla Mesken bi ruhê Apoyî mezin bûye, bi tarzê fedayî şer kiriye û jiyan kiriye. Ji şervantî heta fermandariya xwe, ji Avaşîn heta Metînayê carekê jî nesekinî. Hingî ku şer mezin dibû, Mesken jî bi germiya dilê xwe ber bi armanca xwe ve diçû. Ji bo azadiyê tercîheke zanebûn kir û lewma bû gerîla, bû şervan, bû milîtana PKK-PAJK’ê. Mesken Nisêbîn a evîndara welatê xwe, di sala 2023’yan de li herêma Metîna dema li ser wezîfeya xwe di êrîşa dijmin de şehîd bû. Şehîd Mesken xeyala xwe ya serketinê û armanca xwe ji hevrêyên xwe re mîrate hişt. Wê sozên ku bi rûmeta xwe daye û wezîfeyên xwe bi cih anî û di nava lehengên azadiyê yên di rûpelên dîrokê de cih girt.
