Fermandariya Yekîneyên Berxwedana Şengalê (YBŞ), daxuyaniyeke nivîskî weşand û şehîdên meha Tebaxê bibîr anî.
Daxuyaniya Fermandariya YBŞ’ê bi vî rengî ye:
“Di vê meha êşdar a her salê de, birînên nebaşbûyî û bîranînên şehîdên ku li hember neheqî û fermanê alên serbilindî û rûmetê bilind kirine vedigerin bîr û hişê me. Îro, em cangorî Mamê civaka xwe Zekî Şengalî bi bîr tînin, ku ji êş û azarên Êzîdiyan re stargehek bû. Di heman demê de stûn û xiveta tifaq û yekrêziya wan bû. Her wiha em cangoriyê dilsoz Seîd Hesen, ku koka hêzên me û stûna têkoşîna me bû. Jiyana xwe hemû ji bo bidestxistina mafên Êzîdiyan û parastina hebûna wan feda kir, bi bîr tînin.
Di şexsê wan de em karwanê qehremanên xwe yên ku destanên qehremaniyê li dijî çeteyên DAÎŞ nivîsandine, wek Amargî, Hecî, Îsa, Mahir, Pîr Xidir, Qîran, Elî, Dexîl, û tevahiya cangoriyên meha Tebaxê ji cangoriyên teqîna Girizêr û Sîbayê, Komkujiya Koço, heya cangoriyên nexweşxana Sikêniyê bibîr tînin. Armancgirtina heval û gelê me ji hêla dewleta dagirker ya Tirk û hevkarê wê DAÎŞ ve, hewildanek bû ji bo têkbirina îradeya me û tolhildanek ji bo helwestên wan ên qehremanî li dijî çeteyên DAÎŞ’ê.
Di vê mehê de di dîroka me de gelek bûyerên trajîk qewimîne, ji bombebarankirina nexweşxaneyên sivîl bigire heya bombebaranên xwînî yên li Girizêr û Sibayê û qirkirina gundê Koço. Ev sûc ne tenê tesadufên trajîk bûn; ew girêdanên zincîrek sîstematîk bûn ku armanc ew bû ku gelê me ji kokê rake, ji nebûna hêzek Êzidî ya herêmî sûd werbigirin da ku wan biparêze û bergîriyê li wana bike.
Lê belê, ji damezrandina Yekîneyên Berxwedana Şengalê (YBŞ) vir ve, gelê me şûr û mertalek bi dest xistiye, hêzek ku ax û rûmeta wê diparêze û mafê wê yê jiyanek azad û bi rûmet di bin her şert û mercî de diparêze û wê biparêze.
Em, wek Yekîneyên Berxwedana Şengalê (YBŞ), di vê salvegera bi êş de bang li gelê xwe dikin ku vê mehê bikin wesîle ji bo hevgirtin û tifaqa xwe, ji ber ku di yekîtiyê de hêz heye ku hebûn û rûmeta me diparêze, lê di bêtifaqiyê de qelsî heye ku careke din deriyên xetereyê vekirî dihêle.
Her wiha; em soz didin civaka xwe û cangoriyên xwe yên qehreman ku em ê têkoşîna wan bidomînin û em ê dudilî nebin ku hebûn û rûmeta gelê xwe li dijî her hêzekê biparêzin. Em ê heta ku armancên wan pêk werin û jiyanek ewle û bi rûmet ji bo hemû Êzidiyan û Şengalê misoger bibe, li ser şopa wan bimeşin.”
