Rêsandina xalîçeyan, yan jî tevn di nava Kurdan de yek ji çandên herî kevnar e ye û dîroka xwe digihêje heta serdema civaka xwezayî ya bi pêşengiya jinê. Jinên Kurd, bi taybetî jî dayik vê çanda kevnar hîn jî diparêzin û ne tenê xalîçeyan, her wiha rengê civaka Kurdîtiyê jî dirêsin.
Yek ji wan jinan jî Xanim Qadir Yûsif a ji bajarê Kobanê ye, ku li gel temenê xwe yê 85 salî tevnê dike. Xanim Qadir Yûsif ji ANF’ê re axivî, qala bîranîn û karê xwe kir.
Xanim Qadir Yûsif dibêje, ew jid ayika xwe hînî rêandina xaliyan bûye û di rêsandina her xaliyekê de rojên berê tê bîra wê.
Xanim Qadir Yûsif anî ziman ku ew bi rengan neqşên ji çanda Kurdewariyê nîşan didin û got, “Ev 60 sal e ku ez bi tevnê jiyana xwe ya rojane didomînim. Bi tevnê re radibim û rûdinim. Ev meraqa min e. Salê du an jî sê xaliyan çêdikim û bi wan xaliyan re jî çanda dayîkên me yên pêşîn jî pêk tînim.”
Xanim qala salên berê kir û got: “Berê dayikan xaliyên ji neqşên cuda çêdikir, ji bo rûniştandinê. Vê yekê bala min dikişand û ji wan hîn bûm. Heta niha jî ez tevnê dikim. Ez ji sibehê û heta ber bi êvarê, xaliyên xwe dirêsim. Bi deziyên rengo rengo ez wan xaliyan dirêsim û wê yekê diparêzim. Hin kesan jî xwe ji me fêr kirin. Lê di nava civaka me ya roja me ya îro de ev çand hinekî hatiye paşguhkirin. Ez jî dibêjim ku divê em vê çandê biparêzin.”
Xanim di dawiyê de got, heta mirinê ew ê karê xwe dewam bike û wiha dewam kir, “Min li destên kesên temen mezin didît û bi wê re ez fêr dibûm. Ev karekî pîroz e û her kes jê hez dike. Berê em di quban û di xaniyên kelpîçî de rûdiniştin. Zivistanê me ew xalî raxista û li dora pîzotên agir ez û zarokên xwe rûdiniştin. Ez ê heta mirinê jî vî karî dewam bikim û xaliyan jî birêsim. Kurê min ê şehîd jî ji karê min pir hez dikir. Her ku ew dihat malê, li kêleka min rûdinişt û li min tamaşe dikir.”
