8’ê Adarê Roja Jinên Kedkar ên Cîhanê li çar aliyên cîhanê, ji aliyê hemû jinên cîhanê ve wek roja têkoşînê tê destgirtin û her 8’ê Adarê bi gelek çalakiyên cur be cur tê pêşwazî kirin. Ev roj ji bo Tevgera Azadiya Kurdistanê jî xwedî wateyeke mezin e. Bi vê boneyê gerîlayên Azadiya Kurdistanê hest û fikrên xwe yên di derbarê 8’ê Adarê bi me re parve kirin.
JIN BI FELSEFEYA RÊBER APO XWE MEZIN KIR
Ronahî Reşîd yek ji gerîlayên YJA-STAR e. Bi xwe xelkê Kobanê ye. Ev çend sal in li ser çiyayên Kurdistanê tekoşînê dide meşandin. Bi wesîleya 8’ê Adarê hestên xwe bi me re parve kir. Gerîlla Ronahî da diyarkirin ku sala 2025 hem wek gel hem jî wek tevger krîtîk e û wiha got; “Ez bi gelê me yê niha li Tişrînê berxwedaneke bêhempa dide meşandin, ser bilind im. Wî gelî li hember dagirkeriyê serî netewand, natewîne jî. Em jî her li pişt gelê xwe ne. Berê di nav civakê de jin di rewşek ketî de bû. Nedikarî tîştek bike. Her tişt di bin destê zilam de bû. Lê dema tu niha mêze dikî jin hemû tiştî bi rê ve dibe. Jin bi felsefeya Rêbertî xwe pêş xistiye.”
Gerîla Ronahi got ku jin bi têkoşîneke mezin di nav refên gerîla de cîh digrin û bi van gotinan dirêjî da axaftina xwe; “Di nav tevgerê de em gihîştine asteke herî bilind. Hêza heyî dihêle ku cîhan pê rabibe. Li her deverê tu mêze dikî ji bo 8’ê Adarê, jin radibe ser piyan, xwe nas dike, kesayeta xwe dizane, di nav pergalê de xwe bi rê ve dibe.”
KES NIKARE SERÎ LI JINAN BIDE TEWANDIN
Gerîla Ronahî Reşîd wiha got; “Jin gihîştine wê astê ku êdî ji bo ti kesî serî natewîne. Çi li hemberî zilam dibe û çi jî li hemberî zîhniyeta zilam dibe. Ji ber ku êdî kesayeta xwe naskiriye û xwe gihandiye asta Rêbertî. Rêbertî fêm kirine û tevlîbûneke hîn xurttir didin raber kirin. Em jî wek gerîllayên YJA-STAR û gerîlayên PAJK’ê bi vê wesîleyê gihîştine astek wisa ku em çawa xwe bi rê ve bibin, çawa xwe xwe bidin meşandin, nas bikin, çawa xwe di nav PKK’ê de bidin meşandin. Bi taybetî jî bi fikir û felsefeya Rêbertî ev pêk hat. Ji ber ku Rêbertî dibêje divê jin xwe pêş bixe, jin xwe zana bike. Em jî di kesayeta Rêbertî gihîştine wê astê ku em dikarin xwe birêve bibin. Ji jinê çi were xwestin jî wê bikaribe bike. Hêzeke muthîş di jinê de heye. Jin bi hêz û îradeya PKK’ê jî bi bawer e.”
Gerîla Ronahî Reşîd di dawiya axaftina xwe de kêfxweşiya xwe ya bi dîtina wêne û nameya Serokatî anî ser ziman û 8’ê Adarê di serî de li Serokatî li hemû jinên cîhanê, gelê Kurd û gerîlayan pîroz kir.
YEKÎTIYA JINAN NEBE NABE YE
Gerîlayê YJA-STAR’ê Jînda Çelê jî 8’ê Adarê li tevahiya jinan pîroz kir û bal kişand ser têkoşîna jinan ku bi salan in didomîne; “Jin heta roja me ya îro têkoşîn dide meşandin. Divê ti jin pergalê ji xwe re esas negrin. Pergal her tim jinê tine dike hem di aliyê madî de hem jî di milê manewî de. Ez bang li jinên li nav civakê dikim; Dikarin têkoşîna xwe bêhtir mezin bikin. Divê hemû jin destê hev bigrin. Heta jin nebin yek, wê heya dawiyê wisa be. Ji ber ku pergala kapîtalîst bi jinê re ewqas lîstiye ku li holê tiştek nehiştiye. Divê jin îradeya xwe bibîne. Jin çawa dikare şer bike? Li ser vî esasî Serokatî tevgera jin ava kir.”
‘DIVÊ JIN DI FERQA KEDA XWE DE BIN’
Gerîlla Jînda anî ziman ku jin bi her êşê re rûbirû maye û keda wê her tim hatiye xwarin û wiha got; “Bi qasî ku keda zilaman di nav pergalê de tê dîtin, ya jinan nayê dîtin. Divê jin di ferqa keda xwe de bin. Di ferqa hêza xwe de bin ku hem li hemberî pergala kapîtalîst hem jî li hember dagirkeriya zilam dikarin têkoşîn bikin.”
Gerîlla Jînda Çelê anî ser ziman ku di nav Tevgera Azadiyê de ya herî pêş jin e û wiha axivî; “Bêhtir jin têkoşîn dike. Jin hatiye naskirin ku jin dikare bi îradeya xwe di her milî de xwe pêş bixe. Di vê mijarê de têkoşîneke mezin daye.”
HETA SERKEFTINÊ TÊKOŞÎN!
Gerîlla Jînda Çelê bang li hemû jinên cîhanê kir ku yekîtiya xwe pêk bînin û got: “Divê hemû jin yek bibin, ger nebin yek pergal wê jinê her tim tine bike û her tim wê pê bide winda kirin. Ger jin bibin yek pergal jî nikare jinê bi bin bixe. Ger yekbûn nebe wê azadî jî çênebe. Divê jin hev du bigrin ku bikaribin azadiya xwe jî pêş bixin.
Ez carek 8’ê Adarê li hemû jinan pîroz dikim. Em soz didin Serokatî em ê vê têkoşînê heta dawî berdewam bikin û ji vir jî Serokatî silav dikim; Me xeberek ji te girt, em pir kêfxweş bûn û pir bandor bûn.”
