Koma Aştî û Civaka Demokratîk bi banga Rêber Apo li Silêmaniyeyê di merasîmê de çekên xwe îmha kirin. Şandeya Partiya Wekhevî û Demokrasiyê ya Gelan (DEM Partî) ya ku tevlî merasîmê bû li Debaşanê bi Serokê Yekîtiya Niştîmanî Kurdistanê (YNK) Bafil Talebanî re civiya. Hevseroka Giştî ya DEM Partiyê Tulay Hatîmogullari û Hevserokê Partiya Herêmên Demokratîk (DBP) Keskîn Bayindir û Parlementerê DEM PartîİYÊ Serhed Eren di şandeyê de cih girtin.
Bafil Talabanî der barê merasîma îmhakirina çekan a gerîlayên PKK’ê de wiha got: “Niha dem dema pêçandana birînan û vekirina rûpelek nû ye ku li Bakurê Kurdistan û Tirkiyeyê li ser bingeha aştî û jiyana bi hev re ye.”
Talebanî anî ziman ku çawa Mam Celal weke yekem endazyarê serekî yê pêvajoya aştiyê bû yekem car deriyê gotubêjê di navbera Qendîl û Enqereyê de vekir, ew jî li ser heman rêyê berdewamin.
Şandeya DEM Partiyê, spasiya xwe ji Bafil Talabanî re kir û bal kişand ser rola wî ya erênî û piştgiriya wî ya berdewam.
