Fermandariya Giştî ya Yekîneyên Parastina Gel (YPG) bi boneya salvegera 5’emîn a şehadeta fermandar Nûreddîn Sofî daxuyaniyek nivîskî weşand.
Daxuyanî bi vî rengî:
”Di 6’ê Nîsana 2021’an de Fermandarê me yê mezin Nûreddîn Sofî, di encama êrişa dewleta dagirker a Tirk de li Garê gihaşt şahadetê. Em fermandarê xwe û pêşengê şoreşa Rojava bi rêz û minetdarî bi bîr tînin û di serî de ji malbata wî ya welatparêz û ji gelê berxwedêr ê Kurdistanê re sersaxiyê dixwazin.
Fermandar Nûreddîn di sala 1970’yî de li gundê Mîşerfê yê Qamişloyê ji dayik bûbû. Ji ber vê jî Rojava, ji bo fermandar Nûreddîn Sofî cihekî taybet bû. Malbata wî malbateke welatparêz, xwedî kevneşopiyên olî-exlaqî û bi çanda xwe ve girêdayî bû. Dema li Helebê zanîngehê dixwîne Apoyiyan dinase û di 1990’an de tevlî Tevgera Azadiya Kurd dibe. Bi salan li çiyayên Kurdistanê têdikoşe. Di serî de li Heftenîn, Zagros, Qendil, Serhed, Amed, Botan û li gelek deverên kurdistanê têkoşîna Kurdistanê dimeşîne. Fermandar Nûreddîn Sofî, di sala 2013’an de bi şerê navxweyî yê Sûriyeyê re vedigere Rojava û dibe pêşengê şoreşê. Bi salan di têkoşîna azadiya Kurdistanê de bûbû xwedî tecrûbeyên bêhempa. Bi tecrûbeyên xwe yên leşkerî û siyasî, di pêşxistina şoreşa Rojava û gihandina wê de heta roja îro de xwedî kedeke sereke ye.
Di van salan de, Sûriye û giştî herêm ber bi guherîneke mezin ve diçû. Ev guherîn an dê gelan bigihanda pergaleke azad û demokratîk, an jî dê wan ber bi qeyraneke kûrtir ve bikişanda. Ji bo Sûriye, ku xwedî avahiyeke kozmopolît a ji civakên Kurd, Ereb, Suryan, Ermen, Tirkmen û Çerkezan pêk dihat, rêvebirin û modelek nû pêwîst dikir. Şoreşa Rojava ku di 19’ê Tîrmeha 2012’an de hat ragihandin, weke pêşengê azadî û demokrasiyê dest bi avakirina pergala xwe kir. Ew ne tenê li Sûriyê, lê li hemû herêmê li dijî qeyrana ku dihat jiyîn bû pergaleke alternatîf. Şoreşa Rojava, bû şoreşa hevpar a gelên Sûriyeyê. Ji aliyekî ve li dijî dewletên paşverû yên herêmê, ji aliyê din ve jî li dijî komên cîhadîst bû navenda şoreşa gel.
Şoreşa Rojava bi keda mezin û bi qehremaniya pakrewanên xwe ve û di berdêla bi hezaran şehîdan ve ji nav tunebûnê hat afirandin. Bi fermandarên mezin, şervanên qehreman û gelê me yê fedakar, dîrokeke nû hat nivîsandin. Bêguman, yek ji pêşengên şoreşa me jî rêhevalê me, fermandarê mezin Nûreddîn Sofî ye. Bi hatina xwe ya Rojava re di gelek waran de kar û xebat meşand. Fermandar Nûreddîn Sofî, di avakirin û pêşxistina YPG û YPJ’ê de kedeke mezin da. Her wiha di avakirina pergala komîn, sazî û rêxistinên Rojava de xebatên serkeftî meşand.
Hevrê Nûreddîn Sofî, çanda ji malbatê girtî, bi çanda rexistinî re gihand hevdû û di dîroka Kurdistanê de bû fermandar û kesayetek efsanewî. Di şer de fermandarekî piralî bû. Bi zanîna xwe ya kûr û tecrûbeyên xwe yên bêhempa, xwedî dewlemendiya taktîkê bû. Di demên herî dijwar de jî heval Sofî çareseriyekê peyda dikir. Qet bêçare û bêalternatîf nedima. Her dem nêrînên hevalên li kêleka xwe digirt û li ser vê bingehê biryar dida. Rêheval Nûreddîn Sofî, entelektuelekî Kurdistanî bû. Di biryarên xwe de zelal û bi cesaret bû. Fermandar Nûreddîn Sofî, rêhevalê xeta jina azad bû. Ti carî bi kevneşopî nêz nebû û li ser bingeheke rast nêzî xeta jina azad bû.
Hevalê Sofî ji kevn heta nû, ji ciwan heta temen mezinan li ser her mirovê ku ew naskirî bandoreke mezin a manewî, rêxistinî, leşkerî û jiyanî hişt. Her wiha ji bo me jî mîrate û xetek şoreşgerî ya mezin hişt. Fermandar Nûreddîn Sofî 32 salan ji bo Kurdistanê têkoşiya û 8 salên dawî jî li Rojavayê Kurdistanê xebat meşand. Wî, li çar beşên Kurdistanê li dijî hemû êriş û polîtikayên tunekirinê têkoşiya û bi vî awayî navê xwe bi tîpên zêrîn li dîroka Kurdistanê neqişand.
Di şexsê Fermandar Nûreddîn Sofî de; em hemû şehîdên şoreşa Kurdistanê bi rêzdarî bi bîr tînin. Di serî de ji malbata rêheval Nûreddîn Sofî, ji hemû gelê xwe yê welatparêz re sersaxiyê dixwazin. Em soz didin ku dê armanca şehîdên xwe bigihînin serketinê.”
