Fermandariya Giştî ya Yekîneyên Parastina Jinê (YPJ) der barê şehadeta 2 şervanan de daxuyaniyeke nivîskî weşand.
Daxuyaniya Fermandariya Giştî ya YPJ’ê wiha ye:
“Di dîroka têkoşîna me de, gelek lehengên jin hene ku bi her kêliya jiyana xwe dibin mînak û bi her gava xwe dibin rênîşander. Bi kesayeta xwe ya ku bi felsefeya azadiyê ava kirine dibin parêzvanên rêya heqîqetê. Hevrêya me Tolîn Tolhildan û Hela Serêkaniyê jî bi dildariya xwe ya ji bo azadiyê û bi sekinên xwe yên şoreşgerî, bûn yek ji wan stêrkên geş ku di asîmanê Kurdistanê de her tim dibiriqin. Di serî de ji malbatên hêja yên hevrêyên me, em ji tevahî gelê xwe yê welatparêz re sersaxiyê dixwazin.
Hevrêya me Tolîn Tolhildan, di nava refên têkoşînê de bi kedkarî û hevaltiya xwe ya kûr dihate naskirin. Wê bawer dikir ku azadî ne tenê armancek e, lê şêwazekî jiyanê ye. Ji ber vê yekê, di her kar û xebatê de bi eşq û azweriyeke mezin tevdigeriya. Rêheval Tolîn, ji roja ku gav avêt nava refên YPJ’ê di her kêliya jiyana xwe de, li dijî tarîtiyê, bû ronahî û li dijî koletiyê bû qêrîna serhildanê. Ji bo hevalên xwe bû mînaka fedakariyê; di nava her gava wê de keda jiyanê hebû. Îro, bîranîna wê di dilê her şervaneke azadiyê de zindî ye. Şehadeta wê, ne dawiyek e, lê destpêka meşeke nû ya ber bi serkeftinê ve ye. Şoreşgerî, meşa li ser xeteke zirave ku her kêliya wê bi talûke û fedakariyê dagirtî ye. Hevrêya me Tolîn, dema ku li ser erka xwe bû, di dîroka 29’ê Adara 2026’an li bajarê Hesekê di encama qezayeke leşkerî de gihîşt mertebeya şehadetê. Şehadeta wê di encama qezayê de, êşa hevalên wê giran kiribe jî, lê vîna wan a tolhildan û şopandina rêya wê xurttir dike.
Di nava rûpelên dîroka me ya berxwedanê de, her şehîdek dibe stêrkek û rêya me ronî dike. Hevrê Hela Serêkaniyê, bi dildariya xwe ya ji bo axê û bi sekna xwe ya bi rûmet, li ser axa pîroz a Rojavayê welat, li navçeya Çilaxa, mohra xwe li dîrokê xist. Hevrêya me Hela, weke keçeke bi rûmet a vî gelî, ruhê berxwedanê yê Serêkaniyê di dilê xwe de her tim zindî girt. Wê dizanibû ku parastina welat ne tenê wezîfeyek e, lê deynê ser milê her mirovekî azadîxwaz e. Ji ber vê yekê, li her bihosta axa ku lê xebitî, bi eşq û baweriyeke mezin tevdigeriya. Hevrêya me Hela Serêkaniyê li gundê Sefa yê girêdayî navçeya Çilaxa, bi giranî birîndar dibe û tevî hemû hewldanan hevrêya me Hela di dîroka 1’ê Adara 2026’an de gihîşt mertebeya şehadetê. Ew birînên ku li bedena wê vebûn, bûn şahidê herî mezin ê dilsoziya wê ya ji bo felsefeya; “Jin, Jiyan, Azadî”. Hevrê Hela heta nefesa xwe ya dawî nîşan da ku îradeya jina azad tu carî nayê şikandin. Hevrêya me Hela di nava rêhevalên xwe de bi van taybetmendiyan dihat naskirin: Di her şert û mercî de, bêyî ku bêje “zehmet e”, bi kedeke mezin beşdarî xebatan dibû. Ji bo hevalên xwe bû çavkaniya moral û hêzê; di çavên wê de her tim hêviya serkeftinê hebû. Ew birîna ku bû sedema şehadeta wê, îro di dilê me de bûye soza tolhildanê û mezinkirina têkoşînê. Meşa wê ya nîvco mayî, îro di destê bi hezaran jinên ku li ser şopa wê dimeşin, ber bi serkeftinê ve diçe.
Şehadeta van herdu hevrêyên me, bangek e ji bo xurtkirina têkoşînê, mezinkirina hevaltiyê û parastina her bihosta vê axê. Em careke din sersaxiyê ji malbatên hêja yên hevrên xwe û ji hemû gelê xwe yê welatparêz re dixwazin. Em soz didin ku em ê ala ku wan hildaye, li her derê bi serfirazî li ba bidin. Em bejna xwe li ber bîranîna şehîdên xwe ditewînin û soz didin ku em ê xewnên wan ên ji bo Kurdistaneke azad û Sûriyeyeke demokratîk bi israr pêk bînin. Em bi rêzdarî bejna xwe li ber ked û têkoşeriya wan û hemû şehîdên azadiyê ditewînin. Rêya wan rêya me ye, soza wan soza me ye.”
Nasnav: Tolîn Tolhildan
Nav û paşnav: Rama El Gead
Cihê jidayikbûnê: Heleb
Navê dayikê: Xufran
Navê bav: Xalid
Cih û dîroka şehadetê: Hesekê, 29.03.2026
Nasnav: Hela Serêkaniyê
Nav û paşnav: Emîne Enco
Cihê jidaykbûnê: Reqa
Navê dayikê: Xatûn
Navê bav: Xalid
Cih û dîroka şehadetê: Gundê Sefa-Çilaxa, 01.03.2026
