Yekitiya Ragihandina Jin (YRJ) bi boneya salvegera 8’an a şehadeta nûçegihanên Ajansa Nûçeyan a Hawarê (ANHA) Dilîşan Îbiş û Hogir Mihemed daxuyaniyek nivîskî weşand.
Daxuyanî bi vî rengî ye:
“Em rojnamevana azad Dilîşan Îbiş bi bîr tînin. Dilîşan Îbiş û hevreyê me yê rojnamevan dema erka xwe ya ragihandina heqîqetê bi cih dianîn, şehîd bûn. Mîna vê rojê di sala 2017’an terorîstan hewl dan dengê heqîqetê vemirînin, lê xwîna her du şehîdan di meşa ragihandina azad de bû ronahiyek ku nayê vemirandin.
Dilîşan dengê jina berxwedêr bû, helwesteke siyasî ya zelal e û israra ku jin di xetên pêşîn ên berxwedanê de nîşan de bû. Dilîşan kamereya xwe wekî çekekê li hemberî tarîtiyê rakir û dengê wê mîna sîleyekî li hember pergalên çewisandina deng û gotina jinên azad bû.
Şehadeta Dilîşan ne dawî bû, lê belê bû destpêka qonaxeke nû ya têkoşîna jinên rojnamevan li Bakur û Rojhilatê Sûriyeyê. Piştî şehadeta Dilîşanê bi dehan jinên rojnamevan dan ser rêya wê; êriş û eniyên şer dişopînin, sûcan belge dikin û li her gundekî û bajarekê çîrokên jinên berxwedêr vediguhêzin.
Em di Yekitiya Ragihandina Jin (YRJ) de bi vê boneyê diyar dikin ku dengê jinên rojnamevan yek ji stûnên şoreşa civakî ya Rojavayê Kurdistanê-Bakur û Rojhilatê Sûriyeyê ye. Fedakariya Dilîşan û Hogir û tevahî şehîdên gotina azad dê pusuleya me ya ber bi ragihandina jin a berxwedêr ve bimîn.
Di dawîn de em soza xwe nû dikin ku em rêya Dilîşanê bidomînin û bi gotina azad û helwesta wêrek mîrateya wê biparêzin. Em ê li hemerî hemû hewldanên bêdengkirina dengê jinan peyama Dilîşanê hilgirin; ji ber ku heqîqeta ku Dilîşanê bi xwîna xwe nivîsandiye beşek ji nasnameya me ya çapemeniyê ye û beşek ji têkoşnîa me ya domdar a ji bo edalet, azadî û wekheviyê ye.
Dilîşan ne bîranîn e, lê rêya ku em temam dikin e. Dilîşan ji bo hemû jinên ku gotina heqîqetê hilbijartine û bi berdêlan parastina vê heqîqetê dikin, hebûneke daîmî ye.”
12’ê Cotmeha 2017’an, dema ku welatiyên sivîl ber bi herêmên rizgarkirî ve dihatin û bi hevkariya şervanên QSD’ê xwe ji hovîtiya çeteyên DAIŞ’ê rizgar dikirin, nûçegihanên me Dilîşan Îbiş, Hogir Mihemed û Rizgar Denîz, ji bo rewşa van koçberan bişopînin, berê xwe dan rêya ‘Xerafî’ ya navbera Dêrazorê û Hesekê. Li vir çeteyên DAIŞ’ê du wesayîtên bombebarkirî teqandin. Di encama teqînê de Dilîşan Îbiş û Hogir Mihemed şehîd dibin û Rizgar Denîz bi giranî birîndar dibe, lii nexweşxaneyên Hesekê, piştre jî li nexweşxaneyên Qamişloyê, herî dawî li Şamê tedawî dibû. Lê tevî hemû hewldanên bijîşkan jî Rizgar Deniz 18′ê Kanûna 2017’an de şehî dibe.
