Endamê Tevgera Çand û Hunera Demokratîk a Mezopotamya (TEV-ÇAND) Delîl Dilpêt bi bîr anîna şehîdên 15’ê Tebaxê re dest bi axaftina xwe kir û got: “Bejna xwe li hemberî şehîdan ditewînim û cejna vejînê ji rêxistinkêr û avakerê vê rojê Rêber Apo pîroz dikim.”
Delîl Dilpêt da zanîn ku 15’ê Tebaxê destpêka dîroka azadiya gelê Kurd, dîrokên kevnar ji şûnde hiştin û rûpeleke nû bi tîpên zêrîn nivîsandin e. Ji derveyî vêya nirxandineke ku li serê were kirin wê ti maneya xwe tinebe.”
‘BI TÊKOŞÎNA 15’Ê TEBAXÊ RE PIRSGIREK HATIYE BER ÇARESERIYÊ’
Dilpêt diyar kir ku ger îro behsa çareserkirina pirsgireka Kurd tê kirin, ger îro hebûn hatiye qebûlkirin hemû li ser roja destpêkê ya têkoşîna Pêngava 15’ê Tebaxê destpê kiriye û wiha domand: “Eger roja îro ku Rêbertî ew înîsiyatîf girt destê xwe, ew pirsgirêk xist rojevê, bi manîfestoya ‘Aştî û Civaka Demokratîk’ pirsgirêk bi her milî ve analîz kir, bi Pêngava 15’ê Tebaxê ew gav hatin avêtin.”
Delîl Dilpêt, 15’ê Tebaxê weke serhildana li hemberî înkarkirinê û tinehesibandinê nirxand û wiha dirêjî da axaftina xwe: “Lewra Rêbertî îro dibêje hebûn hat qebûlkirin. Înkarkirina hebûnê têk çû. Gav gava ji nû ve avakirin û azadiyê ye. Eger ku ew roj nebûya pêşengî, destwerdan û israra Rêbertî nebûya wê îro kesê behsa gelê Kurd nekiriba. Eger îro behsa civaka Kurd tê kirin pirsgirêk ketibe rojevê ku bê çareserkirin, ji bo wê di parlementoya Tirkiyê de niqaş tê kirin, komîsyon hatibe avakirin, ev hemû xwe dispêrin têkoşîna Pêngava 15’ê Tebaxê.”
Endamê TEV-ÇAND’ê Delîl Dilpêt, eşkere kir ku têkoşîna li ser Pêngava 15’ê Tebaxê hatiye dayin hebûn daye qebûlkirin, lê ji bo azadî mîsoger bibe divê Rêber Apo azad bibe, da ku bikaribe ji çareserkirina pirsgirekê re pêşengtiyê bike.
‘JI BO ÇARESERIYÊ DIVÊ ASTENGIYÊN LI PÊŞIYA RÊBER APO WERIN RAKIRIN’
Delîl Dilpêt li hemberî pêvajoyê Aştî û Civaka Demokratîk jî dewleta Tirk şiyar kir û got: “Divê bi nêzîkatiyên bi hesab nêz nebe. Hesabên kêm û sivik wê her kesî bide windakirin. Pirsgirêk, pirsgirêka ku dewleta Tirk ava kiriye ye. Rêbertî ew pirsgirêk derxist holê ku bê çareserkirin. Lewra eger ku lêgerîneke hebe ji bo pirsgirêkê çareserkirinê, li ber destê Rêbertî dikare were çareserkirin. Ji ber vê yekê divê derfetên Rêber Apo bên zêdekirin, astengiyên li pêşiya wî werin rakirin.”
Dilpêt anî ziman ku piştî têkoşîna 52 salan a PKK’ê û 41 salan şerê çekdarî li ser bingeha 15’ê Tebaxê, îro çek tên şewitandin û bang li dewleta Tirk kir ku divê her kes sedema hilgirtin û danîna çekan baş fêm bike, mane bidê û li gorî wê helwest bigre û gavên pêwîst yên huqûqî û siyasî bên avêtin.
‘15’Ê TEBAXÊ RÊVEÇÛNA DÎROKÊ GUHERT’
Gerîlayê HPG’ê Mûrat Baz Helwest jî salvegera 41’emîn a 15’ê Tebaxê li Rêber Apo û gelê welatparêz û hemû gerîlayan pîroz kir û şehîdên têkoşîna azadiyê bi bîr anîn.
Gerîla Mûrat, di têkoşîna azadiya gelê Kurd de encamên ku Pêngava 15’ê Tebaxê derxistina holê weke rojeke dîrokî û pîroz a rizgarbûna ji bindestiyê pênase kir.
Gerîla Mûrat Baz, destnîşan kir ku Pêngava 15’ê Tebaxê û şerê çekdarî, dî dîroka gelê Kurd de qonaxeke nû bi rêbazeke nû pêş xistiye û vê yekê jî hiştiye ku di dîroka Kurdan de cara yekem serhildanek têk neçe, ango rêveçûna dîrokê guhertî ye.
Gerîla Mûrat Baz Helwest, di dawiya axaftina xwe de destnîşan kir ku weke gerîlayên HPG’ê ew ê li ser rihê wêrekiyê yê 15’ê Tebaxê ava kiriye têkoşîna Pêvajoyê Aştî û Civaka Demokratîk bimeşînin.
