Ji welatparêzên herî kevn ên Kobanê bavê 3 şehîdan Mihemed Sidîq bi wesîleya salvegera 41’ê ya Pêngava 15’ê Tebaxa 1984’an ji ANF’ê re axivî.
Mihemed Sidîq bal kişand ser girîngî û wateya rojê ji bo wan û got, “Ev roj ji bo me rojeke sembolîk e. Ew roja hebûn û ispatkirinê ye. Me jî di wê demê de destpê kir. Gelek caran em çûn kampa Mahsûm Korkmaz û di sala 1990’î de min yekemcar Rêber Apo dît. Hêza me di 15’ê Tebaxê de xwe ispat kir.”
Mihemed Sidîq anî ziman ku ji wê roja ku fîşeka destpêkê teqiya jiyaneke ji nû ve ava bû, ew ji mirinê xilas bûn û got, “Mirovahî jî ji wê xewa desthilatdariyê rabû. Em ji mirinê rizgar bûn. Me êdî da ispatkirin ku hêza me jî heye. Ziman û nasnameya me, welat û şoreşa me heye. Ji lewra em rabûn û bi her salê jî em radibin û vê rojê weke rojeke cejnê û pîroz em li hev dû pîroz dikin.”
‘BI HEZARAN GUNDÊN ME ŞEWITANDIN Û GELÊ ME KOÇBER KIRIN’
Mihemed Sidîq anî ziman ku bi pêngava 15’ê Tebaxê re peyama hebûna gelê Kurd ji dewleta Tirk re hate dayin û got, “Dewleta Tirk digot me Kurd kirine. Lê bi pêngava 15’ê Tebaxê re êdî Kurdan her tişt şikand û rabûn ser piyan. Ji wê çaxê ve em jî rabûn û me li hemberî desthilatdariyê serî rakirin. Ew desthilatdariya ku bi hezaran gundê me şewitandin, gelê me koçber kirin. Lê bi saya gerîla em rabûn.”
Di dawiya axaftina xwe de Mihemed Sidîq anî ziman ku îro ew li vir in û xwe ispat ikrine û got, “Êdî dinyayê em nas kirine, însaniyetê em nas kirine. Divê êdî careke din jî em rabin û bi rengekî aştiyane destpê bikin. Em ê teqez bi ser bikevin. Em êdî bi hêza xwe û Rêberê xwe bawer in, em dizanin ku em ê bi ser bikevin, serketin jî teqeze, em ê jî heta dawiyê li pey rêxistina xwe bin.”
