Di çarçoveya hewldanên hêsankirina vegera dilxwaz a koçberan de, îro beşa yekemîn a “Karwanê Hêviyê” ji kampa Holê ber Helebê ve hat birêkirin.
Beşa yekemîn ku ji 42 malbatan anku 178 kesan pêk tê, ber bi bajarê Helebê ve hatin şandin.
Karwanê koçberan bi çavdêriya Rêveberiya Kampa Holê, bi koordîneya Desteya Kar û Barên Civakî û Karkeran a Rêveberiya Xweser a Herêma Bakur û Rojhilatê Sûriyeyê û bi amadebûna Navenda Sûriyeyê ya Lêkolînan û Yekitiya Piştevaniya Îstiqrara Helebê, her wiha bi desteka Komîseriya Bilind a Kar û Barên Koçberan a Neteweyên Yekbûyî (UNCHR) û amadebûna nûnerên Nivîsgeha Têkiliyên Derve ya Rêveberiya Xweser hat birêkirin.
Beriya ku karwanê koçberan ber bi Helebê ve were rêkirin, aliyên beşdar peymanek îmze kir. Piştre jî Rêveberiya Kampa Holê bi hevkariya Rêveberiya Xweser a Bakur û Rojhilatê Sûriyeyê daxuyaniyek da. Hevseroka Rêveberiya Kampa Holê Cîhan Henan daxuyanî xwend.
Di daxuyaniyê de hate gotin: “Li gorî biryara vegerandina welatiyên Sûriyeyî li herêmên xwe ku Rêveberiya Xweser 23’yê Çileya 2025’an a îmze kiribû, her wiha di çarçoveya pabendbûna bi rêgezên mafên mirovan û qanûnên navneteweyî, dîsan jî li ser daxwaza sûriyeyên li kampa Holê yên ji ber şerê navxweyî koçber bûne, biryar hate dayîn ku destûr bidin 178 kesan an ku 42 malbatên ji Helebê vegerin cihê xwe. Ev biryar di çarçoveya vegera bi dilxwazî û bêyî zextên derketina ji kampê de hatiye dayîn.”
Li gorî daxuyaniyê ev gav piştî zêdetirî 3 mehan ji hemahengî û şopandina bi UNHCR’ê re li Şamê û şaxê wê yê li Qamişloyê, her wiha bi hevkariya li gel rêxistinên herêmî yên wekî Navenda Piştgiriya Sûriyeyê ji bo Lêkolîn û Diyalogê li Bakur û Rojhilatê Sûriyeyê û Yekîneya Piştgirî û Îstîqrarê li Bakurê Rojavayê Sûriyeyê hat avêtin.
Di daxuyaniyê de her wiha hate gotin: “Em dê ji bo vegera ewle û birûmet a tevahiya Sûriyeyan li herêmên xwe yên resen bi tevahiya aliyên eleqedar re bixebitin, em rêzê didin daxwaz û rûmeta wan.”
Li kampa Holê 11 hezar koçberên ji Sûriyeyê hene.
