Di çarçoveya xebatên ji nû ve avakirinê yên ku li Şengalê pêş dikevin de, Yekitiya Ragihandina Êzidxanê bi beşdariya 50 delegeyan û nûnerên TAJÊ, Meclisa Gel, nûnerên şaredariyan, Komîteya Dîplomasiyê, Jineolojî, Ragihandina Asayîşê, YBŞ û YJŞ’ê û Ragihandina Azad a Jinên Êzidî, li Geliyê Kersê yê Şengalê bi dirûşmeya ‘Yên ku armanca wan mezine, hewldanên wan jî mezinin’ konferansa xwe lidar xist.
Konferans bi deqeyek rêzgirtin ji bo şehîdên tekoşîna azadiyê destpê kir. Di konferansê de piştî hilbijartina dîwanê, axaftina destpêkê ji aliyê Hevserokê Meclisa Gel a Şengalê Azad Hisên ve hate kirin.
Azad Hisên di destpêkê de şehîdên fermana 3’yê Tebaxê, hemû şervan û gerîlayên ku ji bo azadiya civaka Êzidî canê xwe feda kirine bi rêzdarî bibîr anîn. Hisên 1’emîn Konferansa Yekitiya Ragihandina Êzidxanê pîroz kir û silavên xwe gihandin hemû xebatkarên ragihandinê yên ku ji sala 2014’an ve bi ked û xebata xwe xizmet kirine.
Azad Hisên bal kişand ser girîngiya ragihandinê û diyar kir ku roja îro civaka Êzidî ji her wextî zêdetir hewceyî ragihandineke raste û got: “Di dema korîdora mirovî de, peyamnêran rastiya fermanê gihandin hemû cîhanê û belgeyeke dîrokî afirandin. Li dijî ragihandinên Iraqê ku dixwazin heqîqeta civakê tarî bikin, ragihandina azad di rojên nexweş û xweş de li kêleka gelê xwe sekiniye.”
Azad Hisên destnîşan kir ku ragihandin tenê çêkirina bernameyan nîne, ew deng û heqîqeta civakê ye û got: “Di vê rêyê de kedkarên ragihandinê wekî Nûjiyan, Agir û Murad giranbihatirîn bedel dane û giyanê xwe feda kirine. Wexta ku êrişên bîrdozî û ragihandinê yên dijminan zêde bûne, ragihandin ji bo siyaseta civakê, dîplomasî û avakirina pêşerojê bûye baskê herî esasî. Ez pêşniyar dikim ku ji bo hemû ajans û ragihandinên li Şengalê çarçoveyeke giştî ya hevpar bê diyarkirin.”
Di dawiyê de Hevserokê Meclisa Gel a Şengalê Azad Hisên hêvî kir ku biryarên konferansê bibin wesîleya serkeftinê, avakirina pêşerojeke azad û bibe sêwanek ku hemû ragihandinên din di bin de xizmeta civakê bikin û careke din xebat û keda hemû beşdarvanan pîroz kir.
Piştre perspektîfên Rêber Apo yên ji bo ragihandinê, rapora kar û xebatan û belgeya ji nû ve avakirinê hatin xwendin.
Piştî xwendina belgeyan, ji aliyê amadebûyên konferansê ve nirxandinên berfireh hatin kirin û ji bo xebatên dema pêş pêşniyarên girîng hatin wergirtin. Di axaftin û nirxandinên ku hatin kirin de hate diyarkirin ku Şengal di pêvajoyeke dîrokî û hestiyar re derbas dibe, ji ber wê ji her derê zêdetir pêwîstiya wê bi rêxistinkirina qada ragihandinê heye.
Hat destnîşankirin ku divê ragihandina Êzidxanê têkiliyên xwe bi hemû sazî, ajans û rêxistinên ragihandinê re xurt bike û torên ragihandinê yên navxweyî û navneteweyî bi rengekî aktîf bide xebitandin. Amadebûyan bal kişandin ser wê yekê ku êrişên taybet û şerê psîkolojîk ê li ser civaka Êzidî tenê bi ragihandineke bihêz, rast û rêxistinbûyî dikarin bêne valaderxistin. Di berdewamiya nirxandinan de hat destnîşankirin ku xebatkarên ragihandinê divê bi ruhekî hevbeş û hevgirtî tevbigerin da ku bibin bersiva hemû êş, daxwaz û pêdiviyên civakê.
Hat diyarkirin ku ragihandin tenê nûçegihanî nîne, di heman demê de parastina çand, nasname û heqîqeta Şengalê ye, lewma erkê herî girîng ê pêşerojê avakirina xeta ragihandina azad û xwedîderketina li nirxên civakê ye.
Piştî pêşniyar û nirxandinan, Meclisa Rêveber a Yekitiya Ragihandinê ku ji 10 kesan pêk tê hate hilbijartin. Ji bo xwedîderketina li karê xwe û xizmeta civakê, rêveberî û tevî endamên ragihandinê sond xwarin û konferans bi dawî bû.
Têkildarî biryar û encamnameya konferansê, tê payîn ku di rojên pêş de encamnameya 1’emîn Konferansa Yekitiya Ragihandina Êzidxanê ji bo raya giştî bê eşkerekirin.
