Meclîsa Jinan a DEM Partiyê, li dijî êrîşên zayendperest û nijadperest ên ku demên dawî de ji trîbûnan bilind dibin daxuyaniyek belav kir. Di daxuyaniyê de hate diyarkirin ku êrîşa zayendperest û zimanê nefretê yê ku di şexsê Leyla Zana de li dijî jinan hatiye kirin, bi tundî tê şermezarkirin.
Di daxuyaniyê de ev îfade hatin bikaranîn:
“Em êrîşa zayendperest û zimanê nefretê yê ku di şexsê Leyla Zana de li dijî jinan hatiye kirin, bi tundî şermezar dikin.
Êrîşên li dijî jinên Kurd û siyasetmedarên Kurd bi awayekî organîze tên amadekirin û careke din li trîbûnan hatine nîşandan. Hedefgirtina siyasetmedara jin a Kurd Leyla Zana bi gotinên baviksalar, zayendperest û nijadperest, ne bûyereke ji rêzê ye. Ev êrîşa li ser Leyla Zana, li dijî jinên Kurd û têkoşîna azadiya jinê ye.
Vê hişmendiya ku berê jî wêneyên ‘Torosên Spî û navên ku bi kujerên nediyar tên naskirin li trîbûnan nîşan dabû, îro jî bi hedefgirtina Leyla Zana nîşan da ku faşîzm bi hemû aliyên xwe ve di dewrê de ye. Ev faşîzma ku li ser dijberiya pêvajoya aştî û Civaka Demokratîk pêş dikeve, hedefa xwe ya sereke jinên Kurd û jinên siyasetmedar hilbijartiye.
Rêveberên ku li hemberî vê êrîşa zayendperest û nijadperest bêdeng dimînin û vê wekî ‘berteka alîgiran’ pênase dikin, berpirsiyar in. Pênasekirina vê bûyerê wekî ‘berteka alîgiran’, nîşan dide ku êrîş çiqas bi zanebûn û bi rêxistinkirî hatiye kirin.
Divê ew rêveberên ku li hemberî vê sûcî bêdeng in û bi navê ‘berteka alîgiran’ rewa dikin, tevî koma faşîst a ku êrîş pêk aniye werin tespîtkirin û derbarê wan de demildest karûbarên qanûnî werin destpêkirin. Divê Federasyona Futbolê ya Tirkiyeyê (TFF) demildest berpirsiyariya xwe bîne cih. Divê wezaretên peywendîdar li dijî vê êrîşê bikevin tevgerê.
Em ê êrîşên faşîzma ku ji trîbûnan bilind dibin, qebûl nekin. Em ê bi têkoşîna xwe ya azadiya jinê, ku tirs û xofa vê hişmendiya baviksalar û faşîst e, hebûna xwe berdewam bikin.”
