3 siyasetmedarên jin li Silopiyayê hatin bibîranîn

Bîranîna ku li Kolana Hunerê ya navçeyê hat lidarxistin de  malbatên wan, nûnerên rêxistinên jinan, saziyên sivîl  gelek kes beşdar bûn. Di bîranînê de dirûşmeyên “Jin, jiyan, azadî” û “Şehîd namirin” hatin berzkirin.
 
Di bîranînê de hat gotin ku jinên hatin qetilkirin sembola têkoşîna wekhevî û azadiyê ne.
 
Berdevka Meclisa Jinan a DBP’ê Bêrîvan Bahçecî jî jinên hatine qetilkirin bi bîr anî û got: “Bi ser re 10 sal derbas bûn lê zîhniyet hêj neguheriye. Di van 10 salan de jinan ji bo azadiya xwe gelek bedel dan. Bila zîhniyeta li dijî me baş bizane ku dê jin têkoşîna azadiyê mezintir bikin. Heke daxwaza wan aştî û civaka demokratîk be, divê vê zîhniyeta xwe biguherînin. Ji jinên botanî ditirsin. Em ê di rêya jinên hatine qetilkirin de bimeşin.” 
 
Ji Tevgera Jinên Azad (TJA) Çîmen Fîdan diyar kir ku jinên hatin qetilkirin mirin bi tililiyan pêşwazî kirine û got: “Me, felsefeya Jin, jiyan, azadî diyarî hemû cîhanê kir. Em li dijî hemû qetlîamên jinan li kolanan e. Jin dê pêşengtiya Pêvajoya Aştî û Civaka Demokratîk bikin.” 
 
Berdevka DEM Partiyê Ayşegul Dogan jî anî ziman ku ew kujerên her sê jinan nas dikin û got: “Ev roj ji bo me ne tenê roja bîranînê ye, her wiha roja sozdayînê ye. Divê peyama ji qetilkirina jinan a li Parîsê û Silopiyayê baş were fêmkirin. Ev roj ji bo hemû gelan rojên dîrokî ne. Nehiştin em qurnefîlan deynin cihê hevalên me lê hatine qetilkirin. Aştî, bi domandina sepanên berê nayê. Em ê her sê hevalên xwe ji bîr nekin. Her sê hevalên me jî ji bo aştî û wekheviyê têkoşiyan. Em wan bi rêzdarî bi bîr tînin.” 
 
Dayika Sêvê Demîr Sakîne Demîr jî got: “Em ê bi ser kevin. Zarokên me aştî xwestin. Li dijî zilmê serî netewandin. Zilm li tu kesî nekirin. Xwestin aramî çêbibe, bi ziman û çanda xwe bijîn. Lewma şehîd bûn. Em ê wan ji bîr nekin. Bila ji bo aştiyê her kes destê xwe deyne bin kevir. Aştî, bi axaftinê dibe. Divê her kes guh bide banga birêz Abdullah Ocalan. Em ê bi ser kevin. Em hemû kesî vedixwînin vê têkoşînê. Çareserî bi xwînê nabe. Bijî azadî, bijî Kurd û Kurdistan.” 
 
Daxuyanî, bi dirûşma “Şehîd namirin” bi dawî bû. Girseyê xwest heta Rêxistina DEM Partiyê ya Silopiyayê bimeşe û polîsan hewl dan asteng bikin. Tevî vê jî girse bi dirûşmên “Jin jiyan azadî” û “Şehîd namirin” heta avahiya partiyê meşiya. Di dema meşê de polîsan bi awayekî fîzîkî mudaxaleyî rojnamevanan kirin. Li ser vê yekê jinan bi dirûşma “Destê ji bo jinê radibin bila bişikên” bertek nîşan da.