Meclisa Malbatên Şehîdan merasîma 8 şervanên QSD’ê şehîd Xelîl El Şêx Namis, şehîd Mihemed Mihemed Emîn, şehîd Ferhad Mihemed, şehîd Rîman Îsa, şehîd Mehmûd El Hemed, şehîd Mihemed Hisên, şehîd Mihemed El Nayîf û şehîd Silêman Îzo organîze kir û şehadeta 2 şervanên QSD’ê Murhef Xelef û Elî Omer û şehadeta endamê Hêzên Ewlekariya Hundirîn Hekîm Reşo ragihandin.
Bi sedan şêniyên bajarê Hesekê û gundewarên wê, tevlî merasîmê bûn.
Piştî deqeyeke rêzgirtinê endamê Meclisa Malbatên Şehîdan a bajêr Hesekê Zîwer Elî axivî û got: “Ciwanên me parastina rûmeta xwe kirin û dikarîbûn hemû plansaziyên li dijî me têk bibin. Şehîdên canê xwe ji bo rûmeta me feda kirin, em ê her tim riya wan bişopînin û em weke malbatên şehîdan soza xwe ya parastina deskeftî, keda şehîdan û welatê xwe nû dikin.”
Li ser navê Meclisa Leşkerî ya Hesekê ji fermandarên QSD’ê Dêrsim Hesekê axivî û got: “Bi navê hêzên leşkerî em bejna xwe li beramberî şehîdan ditewînin. Hevalên me li hemberî hêzên tarî parastina welat kirin û pîlansaziyên fitnê qebûl nekirin. Heyanî dilopa xwîna xwe ya dawî parastina welat kirin. Fedakariya wan ji bo me nimûne ye. Kes nikare me qir bike.”
Di dawiya merasîmê de wesîqeyên 11 şehîdan hatin xwendin û radestî malbatên wan kirin. Bi dirûşmên “Şehîd namirin” cenazeyên 8 şehîdan spartin axê.
