Akça banga dawî ya Rêber Apo ji ANF’ê re nirxand û anî ziman ku mesele herêmî nîne, mesele pêwîstiya bi nêrîna bi perspektîfeke gerdûnî ye. Akça ragihand ku pergaleke nû ava dibe û got, ev pergal bi aliyê herî tarî yê aqlê mêr tê avakirin.
Parlamentera Akça got, “Mebest ji aqlê mêr; mejiyê serweriya mêr e ku qetil dike, diçikîne û jehrî dike” û diyar kir ku ev mejî roleke weke pratîka Talîbanê ya li Efganistanê li jinan ferz dike. Akça ragihand ku hewl tê dayin sîstemeke welê bê avakirin ku jin tenê bi kapasîteya xwe ya jidayikbûnê weke metayekê bê dîtin.
Akça got, “Jin divê bi rola avakirina yekser rabin, ne di pozîsyona xwestinê de bin. Ne bi gotina ‘Em dixwazin’, lê bi cihgirtina bi rengê hêmana bingehîn em dikarin li ber vê pergala tarî rabin.”
NIRXANDINA ‘JIN MIN FÊHM DIKIN’
Parlamentera DEM Partiyê bi bîr xist ku Rêber Apo hem di banga 27’ê Sibatê de hem jî di manîfestoyê de işaretê bi modeleke nû ya jiyanê dike û destnîşan kir ku jin pêşengên vê modelê ne.
Akça got, “Rêber Apo dibêje, jin wî fêhm dikin, modela jiyana nû dibîne û xwedî wê hêzê ne ku dikarin vê ava bikin. Roleke mezin dide jinan û hêviyeke mezin dibîne” û destnîşan kir ku ev bang divê di vê çarçoveyê de bê nirxandin.
BINGEHA ENTEGRASYONA DEMOKRATÎK JIN E
Akça qala nîqaşên li ser entegrasyona demokratîk jî kir û anî ziman ku meseleya bingehîn ew e ku jin di navenda vê pêvajoyê de ne. Akça diyar kir ku yên herî zêde li derveyî sîstemê hatine hiştin jin in û pratîka heyî ya siyasî û dadgeriya bi serweriya mer, vê yekê bi şênberî nîşan dide.
Akça biryareke Dadgeha Bilind bi bîr xist ku helwesta jinekê ya ku têkiliya zayendî red kiribû weke “tehrîkê” pênase kir û got, “Ev sîstem nîşaneya şênber a aqlê mêr e ku dibêje, ‘Eger ez bixwazim wê bibe’.”
‘ŞOREŞA BÊYÎ JINÊ MAYINDE NABE’
Akça destnîşan kir ku entegrasyona demokratîk nayê wateya pêvebûna bi sîstema heyî, tê wateya veguherîna sîstemê û diyar kir ku pêvajoyeke veguherînê û aştiyê ya ku jin li derve bê hiştin wê mayinde nebe.
Parlamenter Akça got, “Şoreşeke ku jin di nav de nebe şoreş nîne. Veguherînek bêyî jinê nabe veguherîneke mayinde” û anî ziman ku ji bo veguherîneke demokratîk a rast divê jin di dilê pêvajoyê de be.
