Festîvala Fîlmên Dokûmanter a FîlmAmed a 9’emîn destpê dike ku bi hevkariya Akademiya Sînema ya Rojhilata Navîn û Şaredariya Peyasê ve bi dirûşma ‘Kok… Çîrokên rastî yên li dora êgir’ tê lidarxistin.
Di festîvalê de wê bi giştî 29 dokûmanter bêne nîşandan. Festîval wê 26’ê Îlonê roja Înê bi konserê û fîlmê JINWAR destpê bike û 30’ê Îlonê roja Sêşemê bi dawî bibe.
Di festîvalê de ku wê gelek dokûmanterên li ser mijarên çandî, hiş-bîr, jin û civakê bêne nîşandan, her wiha wê panel jî werin lidarxistin.
‘ARMANC EW E KU YA NAYÊ DÎTIN BÊ NÎŞANDAN’
Endamê Komîteya Amadekar a Festîvalê Sîpan Dagdevîren li ser mîsyona Festîvala Fîlmên Dokûmanter a FîlmAmedê axivî û anî ziman ku festîval amûreke vegotina sînemaya dokûmanter e û dixwazin bi rêya vê yekê meseleyên civakî nîşan bidin.
Dagdevîren ragihand ku ew piştgiriyê didin hilberîna sînemavanên serbixwe û got, “FîlmAmed vediguhere qadeke azad ku bê edaletî, binpêkirina mafên mirovan, berxwedana jin, kedkar û gelan a ku nayê dîtin, nîşan dide. Em hunermendan weke wijdanê civakê dibînin.”
Dagdevîren li ser pêvajoya amadekariyê jî agahî da û anî ziman ku beriya şeş mehan dest bi kar kirin, beriya festîvalê sê atolye hatin lidarxistin û got, “Di bernameya vê festîvalê de em cihêrengiya çandan, têkoşîna jinan, zexta li ser gelan û têkoşînê ji xwe re dikin esas. Fîlmên ku balê dikişînin ser van mijaran wê di festîvalê de bêne nîşandan. Nêzî 40 serlêdan ji bo projeyê hate kirin, 7 fîlm ji festîvalê re man. Armanca me ew e ku dokûmanterên li qadeke alternetîf digerin an jî nayên nîşandan bigihînin temaşevanan. Festîvala Amedê êdî hişekî bi vî rengî afirandiye.”
Sîpan Dagdevîren ragihand ku festîval ji gelek organîzasyonên din cuda ye û got, “Di vê festîvalê de her tiştên ku hatine jibîrkirin an jî li ber jibîrkirinê ne tînin bîra gel. Gelek dokûmanterên li ser şîn û têkoşînê hene. Ji bo balê bikişînin ser têkoşîna gelê Kurd û gelên bindest, çand û huner amûreke girîng e. Em dixwazin hişê vê têkoşînê hem bi dokûmanteran hem jî bi festîvalan hîn bêhtir nîşan bidin. Em li benda tevlîbûna gel a li festîvalê ye.”
