Mamosteyê Çapemeniya Azad Huseyîn Aykol, di 14’ê Cotmehê de li Enqereyê dema li mala xwe, xwîn çû ser mejiyê wî û rakirin Nexweşxaneya Perwerde û Lêkolînê ya Sîncanê. Rojnamevan-nivîskar Huseyîn Aykol, li nexweşxaneyê jiyana xwe ji dest da.
Aykol ku 36 salên emrê xwe di nava Çapemeniya Azad de derbas kir, beriya ku wefat bike hem di 3’yemîn Kongreya Asayî ya Komeleya Rojnamegeran a Dîcle Firatê (DFG) hem jî di bîranîna Apê Mûsa (Mûsa Anter) de axivî.
Aykol, di kongreya DFG’ê ya di 22’yê Hezîranê ya li Amedê de wiha got: “Li hemberî vê îktîdarê medyaya herî mezin em in. Hewcehiya me pê heye ku em vê mezin bikin. Heke ne ji vê medyayê bûya, dê têkoşîna 50 sal in didome li cîhanê nehatibûya danasîn. Bi rastî jî di vê mijarê de em bi rolekî girîng rabûn. Em, parçeyeke vê civakê ne. Me heta niha çawa rê li ber çapemeniya demokratîk vekiribe, em ê ji vir şûnde jî vê meşa xwe bidomînin. Ez jî ji bo ku ev al nekeve erdê dê heta dawiya emrê xwe li vir bim.”
Rojnameger Aykol, di 20’ê Îlonê de tevlî bîranîna Zanayê Kurd Mûsa Anter bû. Aykol, di bîranîna 20’ê Îlonê de soz da ku dê têkoşîna xwe bidomîne. Aykol, di bîranînê de got: “Çapemeniya Azad, dê di avakirina aştiyê de tişta dikeve ser milê xwe bike. Çawa ku bi sala ye ji bo rastiyê derxîne holê têdikoşe, dê niha jî bi heman rengî têbikoşe. Bi avakirina zimanê aştiyê re divê em aştiyê ava bikin. Ji bo vê divê çapemeniya dewletê jî li zimanê xwe hişyar be. Mûsa Anter; binêre em îro hatin vê derê da ku rapora salane pêşkeşî te bikin. Min gelek dixwest ku ji te re bibêjim ‘îsal jî tu rojnameger nehatin qetilkirin, nehatin girtin.’ Lê mixabin wisa nebû. Gelek hevalên me hatin girtin. Gelek rojnameger bi alçaxî hatin qetilkirin. Tevî hemû êrişan jî têkoşîna me dê bidome.”
Aykol, di heman rojê de tevlî merasîma bîranîna Apê Mûsa ya li gundê Sitîlîlê ya navçeya Nisêbîn a Mêrdînê bû. Aykol, li ser gora Apê Mûsa got: “Me îro, ew maseya ku ew bi hesreta wê dijiya ava kir. Belê, tevî kêmasiyên xwe dimeşe. Lîstikekî osmanî tê lîstin lê me karî heta vê rojê bînin. Îroj ev pêvajo li ser pişta gerîlayan dimeşe û herî dawî kongreya xwe kirin û dewrî me kirin. Weke rojnameger, di wê baweriyê de me ku me jî tişta ketiye ser milê xwe kir. Em ê ji vir şûnde jî rojnamegeriya aştiyê bikin. Tişta ji dest tê em ê bikin. Li ser navê xwe ez soza vê didim. Hûn jî vê sozê didin. Dayikên me yên aştiyê li vir in. Divê em vî barî tenê li ser milên wan nehêlin. Bi xwedîderketina li vê pêvajoyê em jî tişta dikeve ser milê xwe pêk bînin.”
