Mitînga Hêvî û Azadiyê ku wê ji bo azadiya Rêber Apo bê lidarxistin, wê di 4’ê Çileyê de saet 13:00’a li Qada Stasyonê ya Amedê pêk were. Hevseroka DBP’ê Çîgdem Kiliçgun Ûçar, Hevserokê DEM Partiyê Tuncer Bakirhan, Ayla Akat Ata û Leyla Zana wê di mitîndê de biaxivin. Hevserokê DEM Partî yê Amedê Abbas Şahîn diyar kir ku amadekariyên mitîngê li seranserê bajêr bi awayekî xurt dewam dike û destnîşan kir ku di navenda xebatê de daxwaza azadiya fîzîkî ya Rêber Apo heye û ev bang di nava civakê de bersiveke xurt girtiye.
DI 17 NAVÇEYAN DE KOORDÎNASYON HATE AVAKIRIN
Hevserokê DEM Partî yê Amedê Abbas Şahîn bilêv kir ku li seranserê bajêr bêyî navber xebatên ji bo mitîngê dewam dikin û diyar kir ku bi rêya komîsyonên ku di 17 navçeyan de hatine avakirin, hem hevdîtinên rû bi rû hem jî xebatên girseyî têne meşandin. Şahîn anî ser ziman ku banga Mitînga Hêvî û Azadiyê ku wê di 4’ê Çileyê de were lidarxistin, di nava civakê de bersiveke xurt girtiye û da zanîn ku daxwaza sereke ya gel azadî ye û ev daxwaz xebatên di qadê de beralî dike.
Şahîn bi berdewamî wiha got, “Niha li 17 navçeyan komîsyon hatin avakirin û xebat têne meşandin. Mal bi mal, kolan bi kolan û rû bi rû xebat têne kirin. Tevî vê xebatên girseyî jî dewam dikin. Di tevahiya 17 navçeyan de koordînasyon hatin avakirin. Ev koordînasyon di çarçoveya banga ji bo Mitînga Hêvî û Azadiyê de xebatê dimeşînin. Hestiyariyeke xurt a ji mitîngên din cuda heye, di vê mijarê de bersivên cidî digirin. Ji ber ku îro daxwaza herî bingehîn a gel azadiya Birêz Ocalan e.
Em ji destpêkê ve vê dibêjin; Bêyî azadiya Rêber Apo gelê me azad nabe, em azad nabin. Em bi vê dirûşmeyê daketin qadan. Gelê me di vê mijarê de pir zelal û bihestiyar e. Niha bi hezaran hevalên me hene ku li qadê ji bo mitîngê xebatê dimeşînin. Hem li ser medyaya civakî hem jî bi belavkirina danezanan û hem jî bi serdanên malan xebatên xwe dimeşînin.”
XEBATÊN JI BO MITÎNGÊ TEVÎ HEWAYA NEBAŞ JÎ DEWAM DIKIN
Abbas Şahîn diyar kir ku xebatên ji bo mitîngê tenê bi navendekî re sînodar nemaye, bi serdanên esnafan û civînên gel belavî qadê bûye. Şahîn da zanîn ku tevî şert û mercên nebaş ên hewayê jî xebat bêyî navber dewam dikin û diyar kir ku amadekariyên teknîkî yên ji bo mitîngê hatine temamkirin û hevdîtina bi gel re wê heta roja dawî dewam bike.
Şahîn wiha dirêjî da axaftina xwe, “Serdanên esnafan têne kirin. Bi heman rengî civînên gel jî têne lidarxistin. Ji duh ve du civînên mezin ên gel hatin kirin. Çetîn Arkaş tevlî yek ji van civînan bû. Bi gotina, ‘Azadiya Birêz Ocalan azadiya me ye’ bi gel re civiya.
Şert û mercên hewayê pir nebaş in, tevî barîna berfê ya zêde û bahozê jî niha jî hinek hevalên me li kolan û malan xebatê dimeşînin. Dema ku em dikevin sala nû jî xebat bi heman rengî dewam dikin. Xebatên teknîkî yên ji bo mitîngê hatin temamkirin, kêmasiyek me tune ye.
Xebatên me wê tevî şert û mercên hewayê jî wê heta roja dawî dewam bike. Rojev bi temamî bi vî rengî hate çêkirin. Hewa çiqas nebaş jî be wê xebat neyên rawestandin; me biryareke bi vî rengî girt. Hevalên me niha tevî firtûne û baranê jî cilên xwe yên baranê li xwe kirine û xebatên xwe dimeşînin. Di heman demê de ji navçeyan diçin gundan. Komîsyonên me li gundên ku rê girtîne ne jî, bi derfetn xwe xebatên xwe didomînin.”
JI BO JIYANEKE DEMOKRATÎK HEMÛ GELÊ XWE VEDIXWÎNIN MITÎNGÊ
Şahîn diyar kir ku avaniya siyasî ku di sedsala dawî de bi têgihiştina netew-dewletê şêwe giritye, ne tenê Kurdan, gel, çand û komên baweriyê yên cûda jî mexdûr kiriye. Abbas Şahîn got ku ji bo derketina ji vê barê dîrokî perspektîfa civaka demokratîk û komara demokratîk alternatîfekî xurt pêşkêş dike. Şahîn bilêv kir ku nêzîkatiya navborî ne tenê ji bo Tirkiyeyê ji bo herêm û cîhanê jî îşaret bi jiyaneke nû dike û wiha bang ji bo mitîngê kir, “Di bingeha mexdûrîteyên ku bi taybet gelê me di pêvajoya sed salî de jiyan kir, avakirina Komara Yekemîn a bi mantiqa netew-dewletê heye. Ji vê pêvajoyê ne tenê Kurd, gelek gel, çand, avaniyên etnîkî û komên baweriyê bandor bûn. Ji bo paşdehiştina vê sedsalê, Rêber Apo paradîgmayek pêşkêş kiriye. Perspektîfa avakirina civaka demokratîk û komara demokratîk…
Em dibînin ku ev paradîgma îro hem ji bo Rojhilata Navîn hem jî ji bo cîhanê model û alternatîfekî ye. Em ji bo vekirina deriyên jiyaneke nû dixwazin ku ev fikir bi awayekî herî xurt were qirîn û her kes vê dengê li ser vê bingehê bilind bike. Em li bendê ne ku hemû gelê me di çarçoveya vê têkoşînê de tevlî mitîngê bibe.”
