Berdevka DEM Partiyê Ayşegul Dogan li navenda giştî ya partiya xwe civîna çapemeniyê li ser rojevê lidar xist. Ayşegul Dogan destpêkê nerazîbûn nîşanî pêla nû ya operasyonan a li hemberî Şaredariya Bajarê Mezin a Stenbolê da û diyar kir ku ev yek destwerdana li îradeya hilbijêran e.
Ayşegul Dogan anî ziman ku destwerdana bi destê dadgeriyê ya li siyasetê dehan salan bi welêt dide windakirin û got, “Heta ku meseleya Kurd neyê çareserkirin, Tirkiye nikare demokratîk bibe.”
Ayşegul Dogan dilsoziya bi pêvajoya aştî û civaka demokratîk re careke din dubare kir û bal kişand ser komîsyona li meclîsê hate avakirin ku hefteya derbasbûyî bi sê civînan karê xwe bi pêş ve bir. Ayşegul Dogan destnîşan kir ku gelekî girîng e ku ev pêvajo li ser zemîna qanûnî bê rûniştandin.
POLÎTÎKAYA TÊKILDARÎ SÛRIYEYÊ: DESTKETIYÊN KURDAN FIRSEND E, RÎSK NÎNE
Ayşegul Dogan bersiv da pirsa têkildarî rewşa li Bakur û Rojhilatê Sûriyeyê û destnîşan kir ku divê Tirkiye polîtîkayeke ku bi Kurdên li Sûriyeyê re bi rengekî mayinde li hev bike, bimeşîne.
Ayşegul Dogan got, “Destketiyên Kurdên li Sûriyeyê, destketiyên gelan ji bo avakirina Sûriyeyeke demokratîk, parastina destketiyên li wê derê, yan jî avakirina pergaleke nenavendî ku gelên li wê derê bi xwe biryarê li ser bidin, ji bo Tirkiyeyê dikare bibe firsendek, ne rîskek.”
NERAZÎBÛNA LI HEMBERÎ HAKAN FÎDAN
Ayşegul Dogan daxuyaniyên Wezîrê Karên Derve Hakan Fîdan ên têkildarî Sûriyeyê rexne kir û got, “Bi zimanekî li gorî pêvajoyê neaxive. Ji destpêka pêvajoyê û vir ve li daxuyaniyên Wezîrê Karên Derve binihêrin. Em bala xwe bidin zimanê wî, zimanê ku tercîh dike, bi taybetî nêzîkatiyên timî yên gefxwarinê, di mijara Sûriyeyê de bala xwe bidin ser têkiliyên wî yên nêz û zimanê ku di civîna çapemeniyê ya hevpar de bi kar anî. Li gorî me, xwestiye demagojiyê bike. Ev zimanê ferzkirinê û serweriyê tenê dikare destê dijberên pêvajoyê xurt bike. Bêguman em bang dikin ku dev ji vî zimanî berde. Pêwîstiya me bi zimanekî çareserî û aramiyê heye. Pêwîstiya me bi zimanekî ku rageşiyê zêde dike, nîne. Yekparebûna Sûriyeyê bi zimanekî cihêkar pêk nayê. Di dîroka mirovahiyê de mînakeke bi vî rengî nîne.”
