Berdevka Partiya Wekhevî û Demokrasiyê ya Gelan (DEM Partî) Ayşegul Dogan, li navenda giştî ya partiyê geşedanên di rojevê de nirxand.
Ayşegul Dogan diyar kir ku yek ji mijara ew li ser disekinin jî başkirina şert û mercên xebat û jiyanê yên Rêber Apo ye û wiha axivî: “Divê ev şert û merc li gorî ruhê pêvajoyê bên başkirin. Pêşketina pêvajoyê hewcehiya xwe bi vê heye. Ev rewş dê bike ku pêşiya pêvajoyê vebe. Dema bêyî navbeynkar hebin karî yekser bi xwe bersiva pirsan bide, ev yek dê bandoreke mezin bike.”
‘DIVÊ RÊ WERE VEKIRIN’
Di berdewamê de Ayşegul Dogan destnîşan kir ku nêzikatiya li hemberî Rêber Apo nêzikatiya li hemberî gelê Kurd e û wiha dirêjî da axaftina xwe: “Piştî hevdîtinan, bi raya giştî re agahî tên parvekirin. Em dixwazin pêvajo bi zelalî pêş bikeve. Em dixwazin rê were dayin ku rojnameger bi xwe biçin û pirsên xwe ji birêz Ocalan bikin. Ev dê ji bo pêvajoyê jî baş be. Birêz Ocalan ev pêvajo di nava şertên bisînor de gihand vê qonaxê. Lêbelê heke şert û mercên wî yên xebatê baş bûna, dê ji bo çareseriya demokratîk û aştiya Tirkiyeyê pêşketineke mezintir çêbûya. Lewma em dibêjin hewceye ev rê were vekirin û ne tenê rojnameger lê akademîsyen, parastvanên mafan, partiyên siyasî, rûspiyên civakê û êdî her kî bixwaze biçe divê bikarin biçin serdanê. Pêwîste rêya vê were vekirin.
‘DIVÊ HIQÛQA BI OCALAN RE HATIYE AVAKIRIN WERE PÊNASEKIRIN’
Naskirin û qebûlkirina rola siyasî, nêzîkatî û lêgerîna diyalog û muzakereyan a Birêz Ocalan wê pêvajoyê hêsantir bike. Ew ê rê li ber wê negire; berevajî vê, ew ê rê li ber pêvajoyê veke. Ew dikare bihêle ku hin nîqaş bi awayekî erênîtir pêşve biçin. Ger rasterast karibe bersiva pirsên ku jê re hatine kirin bide û li gorî daxwazkiriye bêyî navbeynkaran karibe bigihîje raya giştî wê bandorek pir bileztir bike. Di heman demê de ev yek di warê pêdiviyên pêvajoyê de jî divê were bicihanîn. Ji ber vê yekê, em vê mijarê bi tevahî digirin dest û em dixwazin dubare bikin ku pênasekirina hiqûqa bi Ocalan re hatiye avakirin wê bandoreke erênî li pêvajoyê bike.”
‘HEWCEYE MUXALEFET PÊŞIYA VÊ VEKE’
Ayşegul Dogan îşaret bi helwesta partiya muxalefeta sereke kir û got: “Li gorî me partiya sereke ya muxalefetê dikare di vê qonaxê de berpirsyartiyên cidî li xwe bigire. Her ku muxalefeta deokratîk bihêz dibe, her ku bi heev re têkoşiya û muzakere kir û ev qad berfirehtir kir, li Tirkiyeyê dê zemîna avêtina gavên demokratîk û verastkirinên zagonî jî bileztir be.
Em di serdemekê de ne ku êdî ne di bin siya çekan de, lê li ser maseyê bi rêya guftûgoyê divê encam were girtin. Daxwaza me ya esasî ya di vê qonaxê de ew e ku partiyên muxalefetê piştgiriyê bidin pêvajoya ku rêyên demokratîkbûnê vedikin û çareseriyeke adilane û mayinde ya demokratîk a pirsgirêka Kurd. Heta dixwazin ew pêşengtiya vê bikin. Bendewariya me ya ji muxalefetê; hewldan û bizaveke ji bo peydakirina çareseriyên pirsgirêkên welat, hevkariya di demokratîkbûna welat de ye. Em, bangên Serokê Giştî yê CHP’ê Ozgur Ozel ên ji bo hilbijartinê baş fêm dikin. Ji ber ku em jî rastî heman miameleyan hatin û hêj niha jî didomin.”
Ayşegul Dogan herî dawî jî got hewceye têkildarî verastekirinên zagonî demildest gav bên avêtin.
