Rêxistina Partiya Wekhevî û Demokrasiyê ya Gelan (DEM Partî) ya Stenbolê bi boneya salvegera komploya navneteweyî ya li dijî Rêber Apo li ber avahiya DEM Partî ya Fatihê daxuyanî da. Nûnerên partiyên siyasî û rêxistinên civaka sivîl beşdarî daxuyaniyê bûn. Di pankartên “Serokê xwe azad bikin komployê têk bibin”, “Ji komployê re na, ji birêz Ocalan re azadî” û dovîzên “Bê Serok aştî nabe”, “Berxwedana gel komployê pûç dike”, Bê serok aştî şaştî ye” û “Ji sermuzakerevan birêz Ocalan re azadî” hatin vekirin.
Di daxuyaniyê de dirûşmeyên “Bê Serok jiyan nabe”, “Bijî Serok Apo”, “Mafê hêviyê gerdûnî ye”, “Ciwan fedaiyên Apo ne”, “Jin Jiyan azadi”, “Jin jiyan azad, azad bike Rêberti” û “Li çiyayan negere, Apoyî li her derê ne” hatin berzkirin. Girseyê di çalakiyê de posterê Rêber Apo vekir.
Girseya ku hewl da ber bi Parka Saraçhaneyê ve bimeşe, ji aliyê polîsan ve hate dorpêçkirin. Di çalakiya ku gengeşî derket de ji ber dahfdayîna polîsan welatî birîndar bûn.
ZEMÎNA WEKHEV Û DEMOKRATÎK
Hevseroka DEM Partiyê ya Stenbolê Arîfe Çinar bertek nîşanî astengkirina polîsan da û got, “Em bi tecrîda li ser sermuzakerevan Birêz Ocalan re rû bi rû ne û ji ber vê yekê em li vir in. Birêz Ocalan 27 sal in di bin tecrîdê de ye. Heta tecrîd were rakirin û azadiya fîzîkî ya birêz Ocalan were misogerkirin em ê têbikoşin. Ger ‘mafê hêviyê’ yê bi Birêz Ocalan bê naskirin û komîsyon pê re hevdîtinê bike, wê demê em ê bibêjin ku pêvajoyek çareseriyê heye. Em ji bo zemînek wekhev û demokratîk têdikoşin.”
BAL KIŞAND SER TÊKOŞÎNÊ
Parlamenterê DEM Partiyê yê Stenbolê û endamê Komîsyona Meclisê Cengîz Çîçek diyar kir ku komplo ne tenê li dijî Rêber Apo pêk hat. Çîçek anî ziman ku aştiya rastîn bi rêzgirtina ji bo jiyan û nasnameyê dest pê bike û got, “Ev 27 sal in armanca me ya sereke ew e ku ev welat nebe welatê olîgarş û talankeran. Ev welat wê ji bo kesên ku piştgiriyê didin demokratan, wê bibe bibe welatekî demokratîk a Kurdan, Elewiyan û jinan. Birêz Ocalan, 27 sal in di hucreyeke tenê de fikra Komara Demokratîk ava kiriye. Tenê dijminên gel û yên ku mêtingerî kirine sedema hebûna xwe ji vê fikrê ditirsin. Ev bend ji bo sermayedaran e, ji bo kesên ku desthilatdarî dixwaze wan biparêze ye. Ger ev bend werin derbaskirin, wê demokratîkbûn çêbibe û komplo jixwe têk çûye. Her wiha divê komîsyon Birêz Ocalan guhdar bike. Cûdahiya me ji wan ev e ku em zimanê heqîqetê diparêzin. Wê fikra Komara Demokratîk a Birêz Ocalan pêk were. Di vê serdema ku banga rêbertiya damezrîner tê kirin de, tirsa ji dirûşmeyên ji bo Birêz Ocalan û danîna bendan israra çaresernekirinê ye. Aştiya mayînde bi têkoşîna demokratîk pêkan e. Werin em azadiyên gel misoger bikin. Ev rê bi rûmet e û ji bo azadiyê. Heta ku pêvajo bi encam bibe em ê têkoşîna xwe bidomînin.”
Daxuyaniya Tirkî ji hêla Rêvebera DEM Partiyê ya Stenbolê Gîzem Kuzuluk û ya Kurdî jî ji aliyê Rêveberê DEM Partiyê yê Stenbolê Ercan Saglam ve hate xwendin.
Ercan Saglam diyar kir ku ev komplo, operasyoneke navneteweyî bû ku li dijî îradeya azadiyê ya gelê Kurd, li dijî ramaneke ku dikaribû di Rojhilata Navîn de bibe pêşengê veguherîna demokratîk, hatibû plankirin. Saglam anî ziman ku raman û paradîgmaya ku Rêber Apo pêş xistiye ji bo jiyana wekhev û azad e. Saglam bi bîr xist ku tevî şertên giran ên tecrîdê yên ku 26 sal in li Îmraliyê didomin, berxwedana Rêber Apo armanca komployê pûç kiriye û got, “Kevneşopiya berxwedanê ya li ser vê axê, her carê ev tarîtiye parçe kiriye. Derketina birêz Ocalan a li ser qada dîrokê, mohra ‘em hene’ ya gelê ku zincîrên înkarê lê hatibûn danîn e. Qonaxa dîrokî ya ku gelê Kurd bi têkoşîna xwe ya azadiyê ya 52 salan gihîştiye, êdî demeke wisa afirandiye ku tu hêz nikare bibêje ‘Kurd tune ne.’ Îro îradeya gelê me, ramana wî û rêxistinbûna wî, nîşana herî berbiçav a vê rastiyê ye.”
KAMPANYAYA AZADIYÊ YA GERDÛNÎ
Saglam destnîşan kir ku azadiya fizîkî ya Rêber Apo ji bo pêşeroja demokratîk a gelê Kurd û hemû civaka Tirkiyeyê, pêdiviyeke jêveneger e û wiha domand: “Di Cotmeha 2025’an de, Kampanyaya Azadiyê ya Gerdûnî ku sala duyemîn tijî dike, bi armanca misogerkirina azadiya fizîkî ya birêz Ocalan, belavkirina tarîtiya ku komployê afirandiye û gihandina gelên Rojhilata Navîn ber bi asoyê aştiyê ve, mezin dibe. Em jî weke parçeyek ji vê kampanyaya dîrokî, di biryardariya mezinkirina têkoşîna gelê Kurd û hemû hêzên demokrasiyê de ne. Hewldanên modernîteya kapîtalîst ên ji bo vemirandina agirê azadiyê yê ku birêz Ocalan pêxistibû, pûç derketin; berevajî vê, ev agir roj bi roj zêdetir geş bûye û îro bûye meşaleyek ku rêya azadiyê ya gelê Kurd û hemû gelên Rojhilata Navîn ronî dike.
Niha erkê ku dikeve ser milê me ew e ku em vê meşaleyê dest bi dest bigerînin, li çar aliyên cîhanê belav bikin û rêya azadiya birêz Ocalan vekin. Azadiya birêz Ocalan, ji bo aştiya gelan û paşeroja demokratîk gaveke herî berbiçav e. Dema ku em li dijî komployê dengê xwe bilind dikin, bila em dengê azadî û aştiyê jî bi hev re mezin bikin.”
Piştî daxuyaniyê, dorpêça polîsan demek dirêj berdewam kir. Li ser bidawîbûna dorpêça polîsan, girse belav bû.
