Hevserokê Giştî yê Partiya Demokrasî û Wekheviyê ya Gelan (DEM Partî) Tûncer Bakirhan li Meclîsê di civîna koma partiya xwe de rojev nirxand.
Bakirhan bi bîranîna xebatkara partiyê Dîlan Karaman dest bi axaftina xwe kir ku bi rengekî bi guman jiyana xwe ji dest da û sersaxî ji malbatê re xwest.
Bakirhan işaret bi hevdîtina komîsyonê ya bi Rêber Apo re kir û got, “Hevdîtina ku bi Ocalan re hate kirin, meseleya Kurd li ser zemîneke siyasî ya xurt bi cih kir. Ev yek di heman demê de serketina aqlê çareseriyê yê li Tirkiyeyê ye. Niha dem hatiye ku em hiqûqa xwe ya xwişk-biratiyê ji ser zemîna şer derbasî ser zemîna qanûnî û demokratîk bikin. Beriya hevdîtinê tofan rakirin. We jî şopand. Qiyatmet rakirin. Baş e, çi bû? Heyetek ji komîsyona meclîsê dema çû Girava Îmraliyê ma qiyamet rabû? Çi ji me kêm bû? Diyar bû ku belasebep qiyamet hate rakirin. Berevajî vê yekê di rêya aştiyê de vê hevdîtinê qonaxeke derbas kir. Ev gava bi wêrekî ya ji bo avakirina aştiya civakî hate avêtin wê zemîna çareseriyê hîn xurt bike. Em ji vê bawer dikin.”
Bakirhan diyar kir ku komîsyon wê 4’ê Kanûnê jinûve li hev bicive, heyeta ku bi navê komîsyonê çû Îmraliyê wê notên hevdîtinê bi komîsyonê re parve bike û got, ew dixwazin nirxandinên li Îmraliyê bi tevahiya raya giştî re bêne parvekirin.
Tûncer Bakirhan anî ziman ku Tirkiyeyê ji bo aştiyê gotina xwe got û axaftina xwe bi vî rengî dewam kir, “Êdî dem hatiye ku ev gotin derbasî meriyetê bibin. Ya girîng avêtina wan gavan e ku mutabaqata civakî nivîskî bike. Niha berpirsyarî li Meclîsê ye. Bang li hemû partiyan dikim ku ji bo çareseriya meseleya Kurd û demokratîkbûna Tirkiyeyê tevkariyeke rasteqîn bikin. Em ji komîsyonê raporên welê hêvî dikin ku birînên vê xakê bipêçin û azadiyê ava bikin. Ji bo raporên bi armanca çareseriyê bi lez bibin qanûn berpirsyariyeke dîrokî destpêkê li ser milê Birêz Nûman Kûrtûlmûş û komîsyonê ye. Em di wê baweriyê de ne ku ev komîsyon wê vê wezîfeya xwe bi rengekî hêja bi cih bîne.
Yanî eger ji bo aştiyê deriyek hatibe vekirin divê mirov jê derbas bibin. Em dixwazin gelên Tirkiyeyê ji vî derî derbas bibe, kes li derve nemîne. Em siyaseta vê yekê dimeşînin. Meseleya Kurd ne tenê ya Kurdan e, berpirsyariya 86 milyon mirovî ye. Çareserî jî divê bi hev re bê afirandin. Êşên 100 salî tenê bi mutabaqateke civakî ya berfireh, bi aqlekî hevpar ê ji hemû rengan dikare bê çareserkirin.”
Hevserokê Giştî yê DEM Partiyê di dewama axaftina xwe de anî ziman ku ji Bakur û Rojhilatê Sûriyeyê destê dostaniyê ji bo Tirkiyeyê tê dirêjkirin û got, “Divê êdî ev dest li hewayê nemîne. Îlham Ehmed ji bo konfransa navneteweyî ya partiya me hatibû vexwendin, ku wê dawiya vê hefteyê li Stenbolê bê lidarxistin. Wê bi xwe jî anîbû ziman ku wê tevlî bibe. Lê belê di vê mijarê de hîn bersivek ji me re nehatiye dayin. Em li benda bersiveke erênî ne. Bila Îlham Ehmed bê Tirkiyeyê. Bila li ser Sûriyeyê, li ser Bakur û Rojhilatê Sûriyeyê bersivê bide pirsan. Bila fikaran ji holê rake. Rûnên, biaxivin û li hev bikin. Dîplomasî ji bo çi ye? Diyalog ji bo çi ye? Bêguman ji bo vê yekê ne. Reva ji çareseriyê, rabûna li ber destektiyên Kurdan ên li Sûriyeyê bi kêrî kesî nayê. Berevajî vê yekê diyalog û danûstandin wê hem herêmê rehet bike hem jî me hemûyan. Lewma em ji desthilatdariyê hêvî dikin ku ji bo Îlham Ehmed bê Tirkiyeyê helwesteke hêsankirinê nîşan bide.”
