Bi boneya salvegera yekem a koçberkirina şêniyên Efrînê ji herêma Şehbayê, Meclisa Koçberên Efrîn û Şehbayê bi hevkariya Komeleya Civakî ya Efrînê, îro li ber Stadyuma Şehîdên 12`ê Adarê ya li Qamişloyê û li Navenda Ciwanan a li Dêrikê, daxuyanî dan. Koçberên Efrîn û Şehbayê beşdarî çalakiya xwendina daxuyaniyan bûn.
QAMIŞLO
Daxuyanî bi zimanê kurdî ji aliyê endama Meclisa Koçberên Efrîn û Şehbayê Rizgar Lûlû ve û bi zimanê erebî ji aliyê rêvebera Meclisa Koçberên Efrîn û Şehbayê ya Taxa Xerbî Henan Kedro ve hat xwendin. Di daxuyaniyê de wiha hat gotin:
“Salek di ser koçberkirina şêniyên Efrînê ji herêma Şehbayê û gundewarên bakurê Helebê re, derbas dibe. Sedema koçberkirina bi hezaran koçberên Efrînê ji Şehbayê, ji ber çeteyên hov ên di çarçoveya êrişên bi navê Şefeqa Azadiyê de dabû destpêkirin bû.
Piştî operasyonên bi navê Şaxa Zeytûnê ku bi hezaran şêniyên Efrînî ji malên xwe koçber kirin, dar û kevir li Efrînê hatin şewitandin û bi hezaran şêniyên Efrînê hatin revandin û kuştin.
Lê gelê Efrînê jiyana xwe li ser bingeha berxwedana ji bo vegera li Efrînê li herêma Şehbayê domand. Lê belê di encama piştgiriya dewleta Tirk a dagirker û faşîst ji çeteyên xwefiroş ên bi nave Emşat, Hemzat û Sultan Murad, koçberiya duyemîn a gelê Efrîn û Şehbayê ji herêma Şehbayê ber bi rojhilatê Firatê ve pêk hat. Ji ber vê yekê, em van kiryarên ku sûcên li dijî mirovahiyê ne bi tundî şermezar dikin. Em daxwaz dikin ku rayedarên Şamê tedbîr û biryarên lezgîn bigrin da ku berpirsên van kiryaran hesab bidin û Efrînê vegerin warên xwe.
Her wiha em bang li gelê xwe dikin, ji bo vegera girseyî li herêma Efrînê, xwe bi rêxistin bikin û mafê xwe yê rewa yê jiyana birûmet û ewle li ser axa xwe bi dest bixin. Em tekez dikin ku riya herî baş ji bo çareserkirina pirsgirêka koçberan bi awayekî dadwer û domdar bicihanîna peymana 10’ê Adarê ye ku vegera koçberan û misogerkirina parastina wan destnîşan dike, rê dide şêniyên herêmê ku bajar û bajarokên xwe li gorî prensîbên demokrasiya herêmî birêve bibin.”
DÊRIK
Li bajarê Dêrikê, daxuyanî ji hêla endamê Meclisa Efrîn û Şehbayê, Nîhad Mistefa Elo ve hate xwendin. Di daxuyaniyê de hat gotin: “Di pêvajoya 7 salan de li Şehbayê, tevî êrişên berdewam ên komên çete jî, şêniyên Efrînê karî jiyanek demokratîk û birûmet ava bikin. Lêbelê, binpêkirinên mîna revandin, kuştin û îşkenceyê, gelek kes neçar kirin ku careke din koçber bibin. “
Daxuyaniyê wiha lê zêde kir: “Em van binpêkirinan wek sûcên li dijî mirovahiyê dibînin û em daxwaz dikin ku berpirsiyar werin darizandin, milk were vegerandin û vegera ewle ya koçberan bo Efrînê were hêsankirin.”
Di daxuyaniyê de bang li rêxistinên mafên mirovan û gelan, bi taybetî jin û ciwanan hat kir ku piştgiriyê bidin mafê koçberan ji bo jiyanek birûmet û wiha hat gotin: “Pêkanîna Peymana 10`ê Adarê rêya herî baş e ji bo çareserkirina pirsgirêka koçberiyê bi awayekî qanûnî û domdar.”
