Hevserokê Giştî yê Partiya Demokrasî û Wekheviyê ya Gelan (DEM Partî) Tûncer Bakirhan di civîna koma partiya xwe ya heftane de bûyerên di rojevê de nirxand.
Bakirhan di destpêka axaftina xwe de bal kişand ser rewşa li Sûriyeyê û serdana Serokê Hikumeta Veguhêz a Sûriyeyê Ahmed el Şara ya li Dewletên Yekbûyî yên Emerîkayê.
Bakirhan bi bîr xist ku bi serdanê re pêkanînên Sezar hatin rakirin û gelên herêmê ji vê yekê kêfxweş e.
Hevserokê DEM Partiyê anî ziman ku pêvajoya heyî ya li Sûriyeyê divê tevkar be ku Kurd, Durzî, Elewî, Ereb, Tirkmen, Çerkez, Suryanî û mafên wan hemûyan misoger bike.
Bakirhan diyar kir ku ew rola Tirkiyeyê ya li Sûriyeyê girîng dibînin û got, “Em careke din dibêjin ku divê vê rola xwe bi rengekî rast bi kar bîne. Li Sûriyeyê jiyaneke nû tenê bi Komareke Demokratîk a Sûriyeyê dibe ku hemû gel û bawerî wekhev bin.
Têkildarî pêvajoya Aştî û Civaka Demokratîk jî Tûncer Bakirhan nirxandineke bi vî rengî kir: “Ji 1’ê Cotmeha 2024’an û vir ve em hewl didin ber bi aştiyê ve biçin ku bi dehan sal in bi hesreta wê ne. Ya destpêkê, divê qanûna dema derbasbûnê bê amadekirin û entegrasyona demokratîk pêk were. Her aştiya mayinde li ser zemîna hiqûqê ava bûye. Li gel me jî divê bi vî rengî be. Ma aştî bêyî hiqûqê dibe? Li cîhanê nîne. Li cihê ku çek bêdeng bûye lê belê hiqûq neaxive wê rewşa nediyar mezin bibe. Bêbawerî wê belav bibe. Siyaset wê biçûk bibe, hêvî wê têk biçe. Ji ber vê yekê jî divê bi Qanûna Dema Derbasbûnê ev pêvajo bê ewlekirin. Qanûnên entegrasyona demokratîk wê rê lib er hemû reng, deng û baweriyên vî welatî vekin. Ji ber ku ev yek îradeyeke hembezkirinê ya civakî ye. Bi vê hembêzkirinê re em ê ji bo aştiyê qonaxeke gelekî girîng temam bikin. Em van qanûnan bêyî derengxistinê amade bikin. Bi kevirên hiqûqê em aştiya Tirkiyeyê ava bikin.”
‘QANÛNA DERBASBÛNÊ DIVÊ BÊ ZELALKIRIN’
Tûncer Bakirhan bi bîr xist ku îro civîna komîsyonê heye û got, “Ji ber ku em hewl didin meseleyeke dîrokî ya 100 salî çareser bikin, divê em xwe li hinek rexneyan jî rabigirin. Ji ber ku dema aştî pêk hat wê 86 milyon mirov bi salan duayê ji me re bikin. Komîsyon bêyî ku dirêj bike divê di mijara çûyîna ÎmraliYê de bi werekî biryarê werbigire. Qanûna derbasbûnê divê bê zelalkirin, qanûnên azadiyê bêne vegotin, komîsyon bikeve nava liv û tevgerê. Em bawer dikin ku ev komîsyon wê bi ser bixîne. Ji ber ku komîsyon li aliyê rastî yê dîrokê ye. Dive her endamekî komîsyonê zanibe ku wê duaya bi milyonan mirovî werbigire û bi vê têgihiştinê tevbigere. Ev berpirsyariya dîrokî li ser milê komîsyonê ye û em zanin ku wê vê mîsyonê bi cih bîne.”
