Hevserokê DEM Partiyê Tuncer Bakirhan di dawiya mitînga Wanê ya bi dirûşmeya “Ne tecrîd, azadî dê bi ser bikeve” pêk hat de axivî. Bakirhan diyar kir ku gelê Wanê careke din ji bo parastina aştiyê hat gel hev û ev tişt anî ziman:
Em baweriya xwe bi aştiyê tînin. Em baş dizanin ku bê aştî çiqas doz û têkoşînek pîroz û birûmet e. Ger em hemû bi hev re xwedî li vê pêvajoyê derkevin, em bawer in em ê Fîgen, Selahattîn, Nazmî û Bekir ên di girtîgehê de ne azad bikin. Bila raya giştî ya Tirkiyeyê baş li Wanê binêre. Li vê herêmê em kîjan heval, hevrê an jinan dest bidinê, êşê mezin kişandine. We bedelên giran dane, we gelek êş kişandine. Lê tevî hemû êşan, hûn îro li vir behsa aştiyê dikin, hûn behsa demokrasiyê dikin. Hûn xwedî li civaka demokratîk û pêvajoya aştiyê ya ku ji hêla Birêz Ocalan ve tê rêvebirin, derdikevin. Ew nijadperest, ew kesên ku li dijî vê pêvajoyê ne, ew kesên ku dibêjin maf û azadiyên bingehîn ên Kurdan dê vî welatî parçe bikin, divê ji vê qadê dersên mezin derxin. Gelê Wanê, gelê Kurd, tevî hemû êşan, tevî hemû ezmûnan, dîsa jî dibêjin aştî. Ger hinekî wijdan, hinekî rûmet hebe, hûn ê bi qasî vî gelê ku xwedî li aştiyê derdikevin, xwedî li aştiyê derkevin.”
‘JI BILÎ AŞTIYÊ TI ŞENSEK ME YÊ DIN TINEYE’
Bakirhan anî ziamn ku li Tirkiyeyê ji bilî aştiyê ti şensek din tineye û wiha domand: “40 sal in enerjî û aboriya vî welatî vala çûye. Bi deh hezaran mirovên me jiyana xwe ji dest dane. Em neçar man ku darbestên ciwanên xwe rakin. Lê noqteya ku em gihîştinê eşkere bû ku pevçûn, tundî, înkar û zilm ne çareserî ye. Ji ber vê yekê, bi serketina vê pêvajoya aştiyê ya ku ji hêla Birêz Ocalan ve hatiye destpêkirin, em dikarin pêşiya qetilkirina ciwanan bigirin. Em dikarin aboriya û enerjiya vî welatî ji bo demokrasî û aboriyek dadwerî xerc bikin. Ev pêvajo ji bo me pir biqîmet e… Gelê Wanê ji bo aştî û çareseriya demokratîk ev qad tijî kiriye.”
‘TECRÎD LI SER ME HEMÛYAN TÊ MEŞANDIN’
Bakirhan anî ziman ku Rêber Apo di vê pêvajoyê de kedeke mezin daye û wiha pêde çû: “Ji bo Tirkiyeyê ji kaos û krîzê rizgar bibe deriyek vebûye. Lê tecrîd hîn jî berdewam dike. Tecrîda li ser birêz Ocalan tê ferzkirin tecrîda li ser aştiyê ye. Ev tecrîd li se r me hemûyan e, li ser hêviya aştiyê ya 86 milyon kesan e. Divê ev tecrîd demildest were rakirin û şert û mercên xebatê yên birêz Ocalan bên afirandin û karibe bi awayekî azad fikrên xwe bigihîne gelan. Ji bo pêvajoya aştiyê bi ser bikeve, divê ev şert û merc werin afirandin. Ji 25’ê Tîrmehê vir ve, hevdîtinên bi birêz Ocalan re hema hema kêm bûne. Çima? Ma deriyê Îmraliyê kaniya di destê we de ye? Hûn mehekê vedikin, piştre digirin. Ma hûn bi vî rengî piştgiriyê didin vê pêvajoyê? Ma em ê bi vî rengî aştiyê pêk bînin? Ev nêzîkatiya ‘mehekê veke, mehekê bigire’ xizmetê ji pêvajoya aştiyê re nake. Divê ev nêzîkatî demildest were terikandin û divê şert û mercên jiyan û xebatê yên birêz Ocalan bên başkirin.
‘GER TECRÎD RABE WÊ GIRÊKA AŞTIYÊ VEBE’
Tecrîd ji bo hêviyên gelê me yê ku bêriya aştiyê dikin xerabiya herî mezin e. Aştî cîddiyetê dixwaze, çareserî jî wêrekî dixwaze… Bawer bikin ku ger tecrîd rabe wê li Tirkiye û Rojhilata Navîn girêka aştiyê vebe. Kengî deriyên Îmraliyê vebin, wê av bisekinin, hêvî bilind bibin û hêviyên 86 milyon mirovên ku li Tirkiyeyê dijîn û bêriya aştiyê dikin wê mezin bibin. Ji ber vê yekê, ji bo ku hêvî dîsa mezin bibin û aştî pêk were divê tecrîd bê çareserkirin.
Tirkiye mala me ya hevpar e. Bila aştî, aramî û demokrasî were mala me. Bila gel kê/î hildibijêre, ew îrade bi rê ve bibe. Divê niha nakokî, cudakarî û nefret bi dawî bibin. Aştî û azadî wê bi ser bikeve. Têkoşîna gelê Wanê, gelê Kurd, jin, ciwan, kedkar û bindestan wê bi ser bikeve.”
