Aktîvîsta TJA’yê Gultan Kişanak di mîtînga Wanê ya bi dirûşmeya “Ne tecrîd azadî wê bi ser bikeve” hat lidarxistin de axivî û diyar kir ku komîsyona ku li Meclîsê hatiye avakirin divê bi Rêber Apo re hevdîtinê bike û got, “Ev ne daxwazek an ferzkirinek siyasî ye; ev pêwîsteke ji bo çareseriya demokratîk û veguherînê ye. Ger çareseriya pirsgirêkê di parlamentoyê de derbas bibe, divê pêşî ev hevdîtin pêk were.
Gultan Kişanak di mitînga ku gelek kes beşdar bûn de axivî û diyar kir ku berxwedan gihîştiye qonaxeke nû û got: “Heta ku em hemû mafên xwe bi dest bixin, wê jin, ciwan û gel di vê rêyê de bimeşin. Birêz Ocalan, wekî nûnerê aştiyê û navnîşana çareseriyê bangek li gelê me kir. Bi vê bangê re deriyê serdemeke nû ya li ser bingeha veguherîna demokratîk vebû. Em ji aştî, çareserî û jiyaneke wekhev û demokratîk re amade ne. Lê ne pêkan e ku ev pêvajo yekalî bimeşe. Pêwîste hikûmet û dewlet jî biguherin. Di bin rejîma qeyûmê de ne pêkan e ku pêvajoyeke bi tendurist were meşandin. Beriya her tiştî, divê rêz li îrade û dengê gel were girtin.”
‘DIVÊ KOMÎSYON BI OCALAN RE HEVDÎTINÊ BIKE’
Kişanak bal kişand ser komîsyona ku li Meclîsê hatiye avakirin û wiha berdewam kir: “Ger ev komîsyon nûnertiya gel dike, erka wê ew e ku sedema pevçûnan ji holê rake. Divê rêz li zimanê me yê zikmakî were girtin û qanûnên veguherîna demokratîk bên amadekirin. Ji bo şopandineke siyaseta li hemberî gel berpirsyar divê ewil hevdîtin bi Birêz Ocalan re were kirib. Ji ber ku Ocalan mîmarê çareseriya demokratîk û devjêberdana çekan e. Divê komîsyon guh bide pêşniyarên wî û ji civakê re ragihîne. Ger çareserî li parlamentoyê pêk were, divê ev gav were avêtin.”
‘DIVÊ JIN PÊŞENGIYA VÊ PÊVAJOYÊ BIKIN’
Gultan Kişanak bal kişand ser rola jinan jî û wiha pêde çû: “Divê gelê me bibe yek, yekîtiya neteweyî xurt bike û xwedî li îradeya xwe derkeve. Em ne yên li bendê ne, em parçeyeke çareseriyê ne. Em ê xwedî li nasname, ziman û yekîtiya xwe derkevin. Wek jin, em ê erkên xwe bicîh bînin. Jinên ku nîvê nifûsa Kurd pêk tînin, divê li eniya pêş a têkoşînê bin. Hevgirtin rêgeza me ya herî bingehîn a civaka demokratîk e. Wekî gelê ku têkoşîna azadiyê dimeşînin divê em jî dawî li tundiya li dijî jinan bînin.”
