Bang û piştevaniyên li dijî cezayên darvekirinê yên ji aliyê rejîma Îranê ve li dijî girtiyên siyasî berdewam dikin. Tora Mafê Mirovan a Kurdistanê li gel 17 rêxistinên Îranî û cîhanê yên mafên mirovan têkildarî cezayê darvekirinê ya Pexşan Ezîzî û Werîşe Muradî, daxuyaniyek hevbeş dan.
Di daxuyaniyê de wiha hate gotin:
“Bi navê jiyanê, bi navê mirovahiyê, bi navê bedewiyê’. Ev gotin destpêka nameya girtiyê siyasî û yek ji hezaran têkoşerên jin ên Kurd Werîşe Muradî ya ji girtîgeha Evînê ye. Ev gotin carek din dengê jinên Îran û Kurdistanê yên leheng û berxwedêr yên giyanê xwe li dijî pergala mêtingeriyê dikin mertal, tîne bîra me. Ev gotin dengê wan û bersiva banga wan e.”
Di daxuyaniyê de hate destnîşankirin ku piştî destpêkirina şoreşa ‘Jin, Jiyan, Azadî’ li Îranê ji bo derbaskirina atmosfera tirsê dîsa pêleke nû ya darvekirinê hatiye destpêkirin û wiha hate gotin: “Vê carê jî zext û zordariya li ser jin û gelê Kurd, du baskên girîng ên têkoşîn û berxwedanê, ketiye navenda vê pergala mêtinger. Di vê qonaxa nû de jinên wêrek ên weke Werîşe Muradî û Pexşan Ezîzî bi tometên nerast û derew bi cezayên darvekirinê hatin cezakirin.”
Di berdewamiya daxuyaniyê de hate diyarkirin ku du jinên Kurd Werîşe Muradî û Pexşan Ezîzî ku bi salan li dijî zilma sîstematîk a Komara Îslamî têkoşiyane, di bin metirsiya darvekirinê de ne û hate destnîşankirin ku rawestandina darvekirinan pir girîng e.
Bi berdewamiya daxuyaniyê wiha hate gotin: “Em tekezî li ser wê yekê dikin ku Îran tu carî nikare bi afirandina mexdûriyetê di nava civaka têkoşer a Îran û Kurdistanê de krîzên siyasî yên li derve çareser bike û hevsengiyê bike. Werîşe Muradî di nameya xwe ya de ku ji girtîgeha jinan a Evînê nivîsandiye, behsa rewşa Rojhilata Navîn û rewşa navxweyî ya Îranê dike û dibêje; ‘Agirê şer hemû Rojhilata Navîn girtiye û divê em nehêlin ku komkujiyên salên 1960’î li gel şerê ser sînor dubare bibin.’
Ev hevok hişyariyeke dîrokî ye li ser girêdana qeyranên navçeyî, her wiha tepeseriya navxweyî û aliyên aloz û trajîk ên rewşa niha ya Îranê rave dike. Li cihê ku ji bo domandina desthilatdariyê û berdewamkirina otorîterîzma rejîma Îranê, zextên navxweyî û polîtîkayên şerkerî hevdem tê meşandin.
Di doza Werîşe Muradî û Pexşan Ezîzî de jî wek piraniya girtiyên siyasî, mafê dadgehkirina adil gelek caran hatiye binpêkirin. Ev jinên têkoşer ne tenê ji mafê parêzeriyê bêpar man, di heman demê de ji bo îtirafên bi darê zorê rastî zextên giran û êşkenceyên nemirovane hatin. Em wek rêxistinên mafên mirovan helwesta xwe ya li hember vê meyla dijmirovî radigihînin û ji bo edaletê ji bo van her du jinan çi ji destê me tê em dikin.
Îro dengê Werîşe û Pexşan ne tenê li Kurdistan û Îranê ye. Ev her du jin sembolên berxwedan û têkoşîna dîrokî ya jinê ne, jinên ku tevî hemû gef û xeteriyan serî natewînin û ji bo mafê jiyan û azadiyê têdikoşin in. Banga wan ji raya giştî ya cîhanê re banga hevgirtinê ya ji bo hemû jinên ku di bin sîwana zext û cudakariyê de ne ye.
Em wek rêxistinên mafên mirovan û rêxistinên gel daxwaz dikin ku cezayê darvekirina Werîşe Muradî, Pexşan Ezîzî û hemû girtiyên siyasî demildest bên rakirin. Van jinan bi îrade û wêrekiya xwe, demsala nû di têkoşîna azadî û wekheviyê de vekirine û bê guman ev darvekirin dê encamên giran li ser rejîma Komara Îslamî bi xwe re bîne. Her dilopek xwîna van jinan dê bibe birîneke ne jibîrkirî li ser bedena zordar a rejîmê û motîvasyoneke nû ji bo civaka têkoşer a Îranê.
Di vê zindana hov û nemirovane de, pîvana me ya mirovatî zêdetir şîn dibe û di ezmûna desthilatdarî û nemirovane de, jinbûn serbilindî û serkeftin e.”
Navên Rêxistinan:
Komeleya Mafên Mirovan a Kurdistanê, Pêşxistina Perwerdeya Navdewletî, Navenda Parêzvanên Mafên Mirovan, Encûmena Pena Amerîkî, Tora Mafên Mirovan a Kurdistanê, Rêxistina Mafên Mirovan a Ehwazê, Piştevaniya li Dijî Darvekirinê, Kampanya Çalakvanên Belûc, Resanak, Navenda Mafên Mirovan a Abdurrahman Broomand a li Îranê, Ji bo Her Kesî Mafên Mirovan a Îranê, Navenda Siyamek Purzend, Koma Mafên Mirovan a Belûcistanê, Mafên Mirovan a Îranê, Mehrengîz Kar, Saziya Mafên Mirovan a Gelê Azerbaycanê li Îranê, Rêxistina Yekgirtinê ji bo Îranê, Atlasa Girtîgehên Îranê.
