Çeteyên HTŞ’ê yên di bin serkêşiya Colanî de bi piştgiriya dewleta Tirk û hêzên navneteweyî li taxên Eşrefiyê û Şêx Meqsûd ên Helebê ku hemû niştecihên wê Kurd û civaka Êzidî ne di komkujiyê re derbas kir, revand û bi darê zorê da koçberkirin. Berdevka Yekîtiya Ciwanên Êzidxanê (YCÊ) Lîza Xêrî berxwedana Şervanên Hêzên Ewlekariya Hindirîn a ji bo parastina gel û taxên Kurdan silav kir. Lîza Xêrî têkildarî berxwedana Helebê û xeteriyên berdewam dikin de ji ANF’ê re axivî.
Lîza Xêrî destpêkê hemû şervanên li Helebê bedena xwe ji gelê xwe re kirin mertal û canê xwe feda kirin bi bîr anî û wiha dest bi axaftina xwe kir: “Hevalên me yên xwe feda kirin û bênavber li ber xwe dan. Em wan bi rêzdarî bi bîr tînin. Em berxwedana jin û ciwanan silav dikin. Bi taybetî gelê me yê Kurd û Êzidî li wan taxan de berxwedaneke mezin nîşandan.”
Lîza Xêrî bal kişand ser hewldanên li dijî pêvajoya aştiyê ya Rêber Apo daye destpêkirin û got: “Ev saleke Rêber Apo pêvajoyek daye destpêkirin. Li aliyekî dewleta Tirk dibêje, ez aştiyê dixwazim lê li aliyê din çeteyan rêxistin dike. Van çeteyên ku rêxistin dike, dibe ser gelan, gelan qir dike, talanê dikin. Dîsa hevalên me yên jin ên ji bo parastina ax û gelê xwe şer dikin û şehîd dibin, di avahiyan de diavêjin. Ev şerekî bê exlaq e û di tu qanûnên şer de jî nîne. Her kes jî xwe li beramber van kiryaran kerr û lal dike. Her kes ji xwe re bibêje ez mirovim, divê li dijî vî şerî û vê bê exlaqiyê rabe.”
‘EM AŞTÎXWAZ IN, LÊ KÎ BI SER ME DE BÊ EM Ê BERSIVÊ BIDIN’
Berdevka YCÊ Lîza Xêrî da zanîn xeteriya li ser Sûriyeyê li ser Şengalê ye jî û got: “Dewleta Tirk her tiştî dike, ji bo ev pêvajo bi ser nekeve, xwîn were rijandin û gelan tune bike. Bi her awayî hewl didin, pêvajoya ku Rêbertî daye destpêkirin, ji holê rakin. Rast e em aştiyê dixwazin û em naxwazin xwîn were rijandin, lê eger bi ser me de jî werin em ê li ber xwe bidin. Em ê bersiva her kesek êrîşê me bike bidin. Em weke ciwanên Êzidî û gel dizanin, xeteriya îro li ser Sûriyeyê, xeteriya di heman demê de li ser me ye jî.”
‘BILA DEWLETA TIRK REWŞA HELEBÊ JI XWE RE WEKE SERKETINEKÊ NEBÎNE’
Lîza Xêrî ji her kesÎ û bi taybet jî ji ciwanan xwest li dijî xeteriyan xwe zêdetir rêxistin bikin û axaftina xwe wiha bi dawî kir: “Ji ber van xeteriyên hene, divê em xwe zêdetir birêxistin bikin, xurt bikin û tedbîrên pêwîst bigirin. Eger hemû cîhan jî bi ser me de were hêz û îradeya me heye em li beramber bisekinin. Em bi ax û gelê xwe ve girêdayî ne, me soz daye em gel û axa xwe biparêzin. Em ê xwedî li hezaran şehîdên xwe derbikevin. Em ji tu kesî natirsin, kî were ewê tunebûna xwe bibîne. Em hevalên xwe yên şehîd bibîrtînin û berxwedana jin û ciwanên Rojava silav dikin. Em heya dawiyê li ba we ne. Eger were xwestin, emê xwe li sînoran bidin û bi gelê xwe ve biçin. Em li kuderêbin emê li berxwe bidin û çeteyên dewleta Tirk têk bibin, ew ê sernekevin, serketin a me ye. Berxwedana ku em dikin, ji bo pêşeroj û azadiya me ye.
Wê ne bi xêra Tirkiye û tu kesî, pêvajoya aştî û demokratîk pêk were, ew mecbur in qebûl bikin. Eger ew qebûl nekin, Wê ev şerê li Sûriyeyê û Îranê niha tê meşandin hemû li Tirkiyeyê vegere. Bila îro rewşa li Helebê ji xwe re weke serketinekê nebîne.”
Lîza Xêrî axaftina xwe bi silavkirina berxwedêrên Şêxmeqsûd û Eşrefiyê bi dawî kir û got: “Ez berxwedana Eşrefiyê û Şêxmeqsûd silav dikim, bejna xwe li ber berxwedana we ditewînim.”
