Dadgeha Tirk ji ber hincetên bê bingeh 3 sal 9 meh cezayê girtîgehê li hevşaredarê Bajarê Mezin ê Wanê Abdullah Zeydan birî. Piştî cezayê li hevşaredar Abdullah Zeydan hatî birîn, gelê Wanê li dijî îxtîmala qeyûm tayînî şaredariyê bê kirin, li ber şaredariyê dest bi nobetê kirin. Nobeta li ber şaredariyê tevî hewaya ser jî bi hemû hêza xwe didome.
RUHÊ TÊKOŞÎN Û BERXWEDANÊ
Gelê Wanê di hilbijartinên xwecihî yên 31’ê Adarê de hemû nazmetên DEM Partiyê hilbijart û careke din nîşan da ku polîtîkayên şerê qirêj û sextekariyên desthilatdariya AKP-MHP’ê li Kurdistanê têk çûye. DEM Partî cara yekem li Wanê hemû şaredarî qezenc kir. Tevî hemû bêhiqûqî û zilma dewletê jî gel di hilbijartinê de dengê xwe da DEM Partiyê. Desthilatdariya AKP-MHP’ê ku ev têkçûn qebûl nekir, polîtîkaya qirêj careke din xist meriyetê. Ji bo qeyûm tayînî şûna Hevşaredar Abdullah Zeydan ê ku ji aliyê gelê Wanê ve hatiye hilbijartin bike serî li hemû rêbazên dijhiqûqî da. Gelê Wanê bi xweparastina rewa li hemberî hiqûqa dijminatiyê ya ji aliyê dewletê ve tê meşandin, li ber xwe da. Bi berxwedan û helwesta biryardarî ya gelê Wanê re hevgirtineke xurt hat avakirin. Partiyên muxalefetê yên alîgirê demokrasiyê ne bi berxwedana gelê Wanê re hatin gel hev, pêkanînên derqanûnî yên dewletê pûç kirin. Dewleta Tirk tevî hemû hêza xwe jî neçar ma ku paşve gav biavêje û li hemberî berxwedana gelê Kurd careke din têkçû. Desthilat piştî vê têkçûnê neçar ma ku mazbataya Abdullah Zeydan radestî wî bike.
LI DIJÎ DESTESERKIRINA VÎNÊ XWEPARASTINA REWA DIMEŞÎNIN
Desthilatdariya AKP-MHP’ê ya ku têkçûna 10 meh berê hezm nekir, careke din serî li hiqûqa dijminatiyê da. Di encama darizandina dijqanûnî de bi hincetên “Alîkariya rêxistinê kiriye” û “Bi rêya çapemeniyê propaganda rêxistinê kiriye” 3 sal 9 meh cezayê girtîgehê li Hevşaredarê Bajarê Mezin ê Wanê Abdullah Zeydan birî.
Gelê Wanê piştî cezayê girtîgehê yê li Abdullah Zeydan hat birîn, bi fedekarî û berxwedaneke mezin li ber şaredariyê li hev kom bûn û ji bo careke din vîna wan neyê desteserkirin dest bi nobedê kirin. Her roj tevlîbûna çalakvanan nobeta li ber şaredariyê berfireh dibe. Gelê Wanê li hemberî îxtîmala ku şaredarî bê desteserkirin di bin sermaya ku digihêje bin sifir 8 derece nobeda xwe didomîne û heta derengiya şevê li ber agirê pêxistine govendê digerîne.
Tevî sermaya dijwar jî bi sedan kes li ber agirê dadane û di konên li ber şaredariyê hatine vedan xwe germ dikin. Di nobetê de bê navber dirûşm berz dikin û li ber stranan govendê digerînin.
Gel bi îxtîmala ku wê qeyûm tayînî şaredariyê bikin ji ber şaredariyê venaqetin. Hin ji wan li ser kursiyan radizên, hin ji wan jî hewl didin li ser betaniyên ku li erdê hatine raxistin razên. Bi derketina rojê re şorba germ li çalakvan û mêvanan tê belavkirin.
Gelê Wanê bi berxwedana xwe careke din nîşan da ku berxwedan û têkoşîna gelê Kurd li cihê ku vîna wan tê paşguhkirin dest pê dike. Gelê Wanê bi parastina vîna xwe ji hemû gelan re dibe mînaka hevgirtinê.
Zîhniyeta ku vîna gelê Kurd ji nedîtî ve tê û serî li hiqûqa dijminatiyê dide, li pêşberî berxwedana gelê Kurd careke din wê têk biçe.
