Li Wanê mitînga ku ji aliyê Partiya Herêmên Demokratîk (DBP), Tevgera Jinên Azad (TJA) û Partiya Wekhevî û Demokrasiyê ya Gelan (DEM Partî) ve bi dirûşma “Ne tecrîd lê azadî wê bi ser bikeve” hat organîzekirin, bi tevlîbûna bi deh hezaran kesan destpê kir.
Girseya ku qada mitîngê tijî kir, dirûşmeyên “Bijî Serok Apo”, “Bê Serok jiyan nabe”, “Jin, jiyan, azadî” û “Bijî berxwedana zindanan” berz kir. Piştî deqîqeyekî rêzgirtinê, mitîng bi awayekî bi coş destpê kir. Girseyê posterên Rêber Apo vekir û dirûşemya “Bijî Serok Apo” berz kir.
223 karkerên ku ji aliyê qeyûmê ve ji kar hatin derxistin jî bi pankarta “Em karê xwe, nanê xwe dîsa dixwazin” kete qadê.
GULŞEN KURT: DIVÊ BIRÊZ OCALAN BIGIHE AZADIYA XWE YA FÎZÎKÎ
Piştî axaftina silavkirinê ya endamên Komîteya Amadekar Şevîn Polat û Umît Tayanir, Hevseroka DEM Partî ya bajêr Gulşen Kûrt mafê axaftinê girt û wiha got, “Em ji demên pir girîng derbas dibin. Piştî banga aştiyê ya Birêz Ocalan di nava civakê de atmosfereke aştiyê çêbû. Heta ku aştiyeke bi rûmet pêk bînin, em ê têkoşîna xwe bidomînin. Divê tecrîda li ser Birêz Ocalan rabe û bi awayekî fîzîkî azad bibe. Tecrîd sûcê mirovahiyê ye û em ê vê qebûl nekin.”
DAYIKA AŞTIYÊ: DIVÊ KOMÎSYON BI BIRÊZ OCALAN RE HEVDÎTINÊ BIKE
Piştre endama Meclîsa Dayikên Aştiyê Muzeyyen Butun axivî û wiha got: “Piştî banga aştiyê ya Birêz Ocalan, kongre hat komkirin û çek hatin îmhakirin. Ji niha şûnde em jî di qonaxekî nû de ne. Li hemberî gavên Birêz Ocalan, dewletê tenê gava komîsyonê avêt. Muxatabê aştiyê Birêz Ocalan e. Divê em vê aştiyê teqez bigihînin encamekî. Komîsyonê ji bo guhdarkirina dayikan bang li wan kir, lê nehişt bi Kurdî biaxivin. Em ê vê qebûl nekin. Divê Birêz Ocalan bi komîsyonê re hevdîtin bike. Heta ku ev pêk neyê em nikarin qala aştiyeke wiha bikin. Divê deriyên zindanan were vekirin û girtî bigihin malbatên xwe. Em soz didin; ji bo aştî û azadiyê çi dikeve ser me bi cih bînin û aştiyê bi encam bikin.”
Mitîng bi konsera hunermend Aylîn Demîrkaya dewam kir.
BAYINDIR: GELÊ WANÊ HELWESTEKÎ BI RÛMET RABER KIR
Hevserokê Giştî yê DBP’ê Keskîn Bayindir diyar kir ku gelê Wanê dîsa helwestekî bi rûmet nîşan da û bertek nîşanî qeyûman da ku afîsên mitîngê jêkirin. Bayindir wiha got, “Ey qeyûm berê xwe bide vê qadê. Dijminatî tu car bi ser neket û wê bi ser nekeve. Qeyûm dîsa bi dijminane 223 hevalên me ji kar avêt. Zîhniyeta qeyûman dijminê gelê Kurd e. Qeyûmên xwe rakin, ji ber ku qeyûmên ve dijminatiya Kurd dikin. Em soz didin ku wê Neslîhan Şedal û Abdullah Zeydan wê dîsa bibin hevşerdarên vê bajarê. Gelê Wanê timî li ser piyan e. Eger dibêjin qehremanî çi ye, bila berê xwe bidin bê ka gelê Wanê çawa xwedî li îradeya xwe derdikeve.”
‘DEMA AZADIYA BIRÊZ OCALAN E’
Bayindir di dewama axaftina xwe de wiha got: “Gelê Kurd bi salan in çi qezenc kiribe, bi ked û têkoşîna xwe qezenc kir. Niha pêvajoyek heye û pêşengtiya vê Birêz Ocalan dike. Zîhniyeta kesên ku 100 sal in dijminatiya me dikin hîna ne hatiye guhertin. Ji ber ku dayikên aştiyê di komîsyonê de bi Kurdî axivîn, nehiştîn ku biaxivin. Ev gel bi ziman û çanda xwe heye. Kes nikare ziman û çanda me înkar bike. Birêz Ocalan ji bo ji holê rakirina van înkaran têdikoşe. Azadiya Birêz Ocalan ji bo me ferz e. Heta azadiya fîzîkî ya Birêz Ocalan wê têkoşîna me dewam bike.”
‘AZADÎ NÊZ E’
Bayindir herî dawî bal kişand ser yekîtiya di navbera Kurdan de û wiha got: “Ez balê dikşînim ser bûyerên di navbera Lahur û rêveberiya YNK’ê de pêk hat. Ev rewş bandorekî ne baş li ser Kurdan çêdike. Em rewşekî wiha qebûl nakin. Ev rê ne rê ye. Divê êdî tu Kurd hev nekujin. Birêz Ocalan timî banga yekîtiyê dike. Eger em bibin yek em ê li vî welatî azad bibin. Ger em têkoşîn û yekîtiya xwe di pêşengtiya Birêz Ocalan de mezin bikin, em ê azadiya xwe bi dest bixin.”
Mitîng bi axaftinan dewam dike.
