Ji bo gerîlayên HPG’ê Dûman (Şûkrî Karademîr), Agir (Albay Çelebî), Rêber (Albay Îrfan) û Seyfî (Ramazan Altundal) ên ku di dîrokên cûda de şehîd bûne li taxa Haciya Kurdan a navçeya Bismilê ya Amedê şîn hate danîn û bi girseyî hate ziyaretkirin. Nûnerên rêxistinên civaka sivîl û partiyên siyasî bi pêşengiya bi pêşengiya Komeleya Çand, Piştevanî û Alîkariyê ya Malbatên Xizmên Xwe li Dêrgûşa Şaristaniyê Winda Kirine (MEBYA-DER) serdana şîna şehîdan hate kirin. Di meşa ku heta Mala Şînê ya Kazanciyê berdewam kir de wêneyên şehîdan û dirûşmeyên “Bijî Serok Apo” û “Şehîd namirin” hatin berzkirin. Dema ku girseyê gihîştin mala şînê, bi yek dengî sirûda “Çerxa Şoreşê” gotin.
Endamê MEBYA-DER’ê ya Amedê Şehmûs Karadag di sersaxiyê de axivî û got, “Hevalên wan her tim têkoşîna xwe berdewam kirine. Ji salên 1990’î heta niha, jin û mêrên Kurd her tim têkoşîna xwe berdewam kirine. Gelê Kurd ti carî li ber zehmetî û zilmê serî netewandiye û qet natewîne. Şehîdên me navên xwe bi tîpên zêrîn di dîrok û cîhanê de nivîsandine.”
Şaban Karademîr li ser navê malbatan axivî û diyar kir ku ew bi rêzdarî li ber têkoşîna wan bejna xwe ditewînin û got ku ew ê têkoşîna şehîdan bidomînin.
JI BO AZAD SERXWEBÛN LI REZANÊ ŞÎN HATE DANÎN
Ji bo gerîlayê HPG’ê Azad Serxwebûn (Adil Farûk Gezîk) ku di 29’ê Nîsana 2019’an de di êrîşa dewleta Tirk a li ser Garê de şehîd bû, li Amedê şîn hate danîn. Şîna ku li Mala Şînê ya Bahattîn Demîrcan (Barman) a li navçeya Rezanê hate vekirin, bi pêşengiya MEBYA-DER’ê bi girseyî hate ziyaretkirin. Beriya serdanê dirûşmeya “Şehîd namirin” hate berzkirin û deqeyek rêz hate girtin.
Endamê MEBYA-DER’ê Mehmet Emin Kiliç li vir axaftinek kurt kir, şehîdên azadiyê bi bîr anî û got: “Ji ber ku şehîdên me, me ji vî dijminê bê pîvan parastin, em minetdarê wan in. Divê em nehêlin ku pêşeroja me tarî bikin. Em soz didin ku em ê li ser şopa wan bimeşin û xeyalên wan pêk bînin.”
Sersaxî wê sibê jî berdewam bike.
