Wezîrê Edaletê Yılmaz Tunç, piştî civîna Komisyona Yekdîtiya Neteweyî, Xwişk-Biratî û Demokrasiyê ya ku di çarçoveya Pêvajoya Aşitî û Civaka Demokratîk de li parlamenê hatibû damezrandin, daxuyanî da.
Tunç anî ziman ku wî di Komisyonê de nêrînên xwe yên derbarê pêvajoyê de parve kirine û bersiv daye pirsên parlamenteran û got, “Komisyonek gelekî girîng e, xebatên wê jî gelekî bi qîmet in.”
Tunç destnîşan kir ku welat ji pêvajoyek dîrokî derbas dibe û bi bîr xist ku di demên pevçûnan de hem ji aliyê aborî hem jî ji aliyê mirovî ve berdêlên mezin hatine dayîn.
Tunç wiha got: “Armanca me hemûyan ew e ku welatê me êdî van windahî û êşan nejî. Em piştgiriyê didin xebatên ji bo serkeftina pêvajoyê. Wek Wezareta Dadê, me xebatên xwe yên ji bo hêsankirina pêvajoyê û serkeftina wê û ji holê rakirina pirsgirêkên ku ji ber pêkanînên karîgeriyê derketine, bi Komisyonê re parve kirin.”
Tunç anî ziman ku babetên derbarê pêvajoyê yên ku pêwîstî bi rêkûpêkirinên hiqûqî hene, di destê Meclîsê de ne û wisa got: “Di vê mijarê de vîna parlamenê dê bi tevahî diyarker be. Li ser biryarên ku komisyon dê bide, nexşerêya ku dê xêz bike û vîna hevpar a ku dê li ser navê milet pêşkêş bike, em ê jî xebatên xwe bidomînin.”
