Li Cizîrê bi pêşengtiya MEBYA-DER’ê ji bo Gerîlayên Azadiya Kurdistanê konê sersaxiyê hate vedan. Konê sersaxiyê li pêşiya bînaya DEM Partiyê hate vedan û wêneyên Rêber Apo, gerîlayên şehîd, gul û filamayên kesk, sor û zer danîn ser maseyan. Li qadê pankartên bi nivîsên; ‘’Şehîdên me rûmeta me ne” ve “Şehîd namirin” û wêneyên şehîdan ên mezin hatin vekirin. Ji bilî malbatên şehîdan, partiyên siyasî, rêxistinên civakî û gelek welatiyên ji herêmê û derdorê tevlî merasîmê bûn.
Bi sedan kes bi girseyî li gel çepik, tîlîlî û dirûşmeyên ‘’Bijî Serok Apo’’ û ‘’Şehîd namirin’’ ketin qada sersaxiyê.
Behiye Pîşkîn a dayika gerîlayê şehîd Baran Pîşkîn (Nîrvana Melek) bi gotinên; ‘’Şehîd namirin. Bila serê Rêber Apo sax be, bila serê gerîlayan sax be. Şehîd ne tenê şehîdê me ye şehîdê her kesî ye’’ kete qada sersaxiyê. Dayikeke din jî got, ‘’Kurekî min şehîd bû, bi hezaran hatin. Em naqedin.’’
Piştî ku hemû malbat li pişt wêneyên şehîdan ên li ser maseyan rûniştin merasîma rêzgirtinê hate lidarxistin. Di merasîma rêzgirtinê de sirûda ‘’Çerxa Şoreşê’’ hate xwendin û dirûşmeyên ‘’Bijî Serok Apo’’ hatin berzkirin.
Berdevka DEM Partiyê Ayşegul Dogan jî beşdarî merasîmê bû û ev yek anîn ziman: ‘’Em xwedî li paşeroja xwe derdikevin. Ji ber ku em dizanin ku em dikarin bes bi vî awayî pêşeroja xwe ava bikin. Ev zarok yên me hemûyan in. Divê wisa were qebûlkirin û wisa xwedî lê derkevin. Em çi qasî tifaqa xwe xurt bikin em ê çarenûsa xwe jî ew qas biguherînin. Em daxwaza pêkvejiyanê dikin. Bila serê me hemûyan sax be.’’
Sersaxî bi beşdariya bi hezaran berdewam dike.
