Federasyona Gaziyên Bakur û Rojhilatê Sûriyeyê, derbarê 1’ê Mijdarê Roka Kobanê ya Cîhanî daxuyaniyek nivîskî weşand. Federasyonê, diyar kir ku 1 û 2’ê Mijdarê ji bo tevahiya mirovatiyê du roj û qonaxên pir girîng in.”
Di daxuyaniya federasyonê de ev tişt hatin gotin, “Li dû azadiya Kobanê 2015’an 1’ê Mijdarê weke Roja Kobanê ya Cîhanê û 2019’an bi armanca piştevaniya bi gelên Bakur û Rojhilatê Sûriyeyê re 2’ê Mijdarê weke Roja Rojava ya Cîhanê hat qebûlkirin û îlankirin. Ev her du roj her sal ji hêla gelên cîhanê ve bi coş û kelecan tê pîrozkirin. Em jî weke gaziyên şer ên di vê şoreşa bûye hêviya hemû mirovatiyê de gelek berdêl dane Roja Kobanê ya Cîhanê û Roja Rojava ya Cîhanê di serî de li gelên xwe yên li Bakur û Rojhilatê Sûriyeyê li tevahî mirovatiyê pîroz dikin.
Weke tê zanîn çeteyên DAÎŞ’ê yên ji hêla dewletên paşverû yên weke dewleta Tirk û ji aliyê hêzên emperyal ve dihatin destekkirin 14’ê Îlona 2014’an bi êrîşên hovane berê xwe dan Kobanê. Ev çeteyên hov ên dixwestin komkujiyên pir mezin pêk bînin, rastî berxwedana bêhempa ya şervanên xwe bi bîrdoziya Rêber Apo gurçûpêç kiribûn hatin.
BERXWEDAN Û ŞOREŞ BÛ RONAHIYA AZADÎ Û WEKHEVIYÊ
Hêzên YPG-YPJ’ê yên tevahî plan û hedefên wan hêzan û çeteyan serûbin kirin, nîşanî her kesî dan bê şervan û welatparêzên evîndarên xaka xwe xwedî qudret û îradeyeke çawa ne. Gelên cîhanê kêlî bi kêlî bûn şahidê dilsoziya bi nirxên mirovatiyê yên di berxwedan û têkoşîna van şervanên egîd de xwe dida der. Vê berxwedan û şoreşa bû ronahiya azadî û wekheviyê, di hişê mirovan de fikreke wer ava kir ku jiyaneke ji derveyî sîstema modernîteya kapîtalîst û rejîmên zextdar heye.
GELEK KES BERÊ XWE DAN BERXWEDANA KOBANÊ
Di encama vê berxwedana mezin û şoreşa Rojava de ji neteweyên cuda ji her aliyê cîhanê mirovan berê xwe dan Bakur û Rojhilatê Sûriyeyê. Xwestin ji vê ava hêviyê, azadiyê û wekheviyê ya di pêşengiya jinê de li ser esasê paradîgmaya Rêber Apo pêş dikeve vexwin, xwe pê têr bikin. Ev berxwedana li Kobanê bi serketinê bi encam bû û şoreşa Rojava helbet berxwedan û şoreşeke herî watedar a dîroka mirovatiyê ya li hember zilm û zorê ye.
BERXWEDANA KOBANÊ Û ŞOREŞA ROJAVA BI TÊKOŞÎN Û XWÎNA ŞEHÎDAN HAT AVAKIRIN
Berxwedana Kobanê û Şoreşa Rojava bi têkoşîn û xwîna hevrêyên weke Arîn Mîrkan, Gelhat Gabar, Diyar Bagok, Gulan Batman, Destîna Başûr, Jiyan Rojhilat û hwd. bi sedan şehîd û gaziyên şer pêş ket. Dê ev hevrêyên me yên bûne nav û dengê vê berxwedanê timî werin bibîranîn. Bi vê wesîleyê em careke din Apê Nemir ê di berxwedana Kobanê de bû sembola welatparêziya Apoyî jî bi bîr tînin. Wan leheng û fedaiyan bi berxwedana xwe tenê ne pêşeroj; di heman de mê paşeroja ji bo gelan hatibû diyakirin jî guhertin.
BI RUHÊ BERXWEDANA KOBANÊ EM Ê TECRÎDA LI SER RÊBERTÎ BI TEMAMÎ JI HOLÊ RAKIN
Weke gaziyên şer em diyar dikin ku heya dilopa xwîna xwe ya dawî em ê Kobanê û Şoreşa Rojava, Bakur û Rojhilatê Sûriyeyê biparêzin. Ji bo em bibin layiqî hevrêyên xwe yên şehîd û Rêbertiya xwe ji her demê zêdetir em ê di nav refên têkoşînê û berxwedanê de cih bigirin. Em destnîşan dikin ku bi ruhê berxwedana Kobanê û Şoreşa Rojava em ê tecrîda li ser Rêbertiya xwe bi temamî ji holê rakin, hemû êrîşên hovane yên dewleta Tirk a faşîst û hevkarên wê pûç bikin.”
