Di 23’ê Tebaxa 2024’an de li navçeya Seyîdsadiq a bajarê Silêmaniyeyê yê Başûrê Kurdidstanê, di êrîşa SÎHA ya dewleta Tirk de rojnamevan Gulistan Tara û Hêro Bahadîn jiyana xwe ji dest dan. Bi wesîleya salvegera yekemîn a şehadeta Tara hempîşe û hevrêya wê ya rojnamevan Sînem Adali ji ANF’ê re axivî.
Sînem Adali qala hevrêtiya 26 salan a bi Gulistan Tara re kir û got, “Şehadeta wê ji bo civata çapemeniyê windahiyeke gelekî mezin e. Rojnamevanek dilsozê nirxan û pîşeyê xwe bû, lewma şûna wê bi hêsanî wê nikaribe bê dagirtin.”
Adali diyar kir ku sala 1999’an li Bakurê Kurdistanê wê Gulistan Tara nas kir û got, “Hingî demeke welê bû ku Rêberê me bi komployeke navneteweyî anîbûn Tirkiyeyê, piştre çalakî zêde bûbûn û li gelek deveran çalakiyên fedaî dihatin kirin. Di wê demê de li navenda bajarê Êlihê çalakiyeke fedaî hatibû kirin. Gerîlayeke jin a bi navê Nezahat Boyaci (Şehristan) ev çalakiya fedaî kiribû. Vê yekê bandoreke mezin li ciwanên Êlihê kiribû. Bandor hem li civakê hem jî li ciwanan kiribû. Di wê demê de ji xwe li Bakurê Kurdistanê, metropolên Tirkiyeyê û Ewropayê çalakî gelekî zêde bûn. Civak li ser xeta fedaî bû. Di atmosfereke bi vî rengî de bi Gulistan Tara re li Bakurê Kurdistanê em di dewreyeke perwerdeyê de bûn û me hev li wir nas kir. Malbata Gulistan Tara welatparêz e. Ew ji malbata xwe hînî kevneşopiya şoreşgerî, welatparêziyê bû. Ji ber ku xwişka wê ya mezin girtî bû, di çûyîn û hatina girtîgehê de di navbera malbatên welatparêz de piştevaniyek çêdibû. Malbata min û malbata Gulistan Tara jî hevdu nas dikirin. Piştî ku hevaltiya me xurt bû em bi vê yekê hesiyan.
Hevala Gulistan wê demê gelekî ciwan bû. Cara yekê ji malbata xwe qut bûbû. Pêvajoyeke perwerdeyê bû, şert û merc giran bûn. Ji aliyê ahengiyê ve zehmetî kişandibe jî ev yek ti carî li pêşiya xwe weke astengiyekê nedît. Timî têkoşiya, hewl da ji holê rake û dixwest hin tiştan bike.
Ya ku destpêkê di bîra min de ma ew bû; ku ji naskirina destpêkê heta bi dewreya perwerdeyê ya 2-3 mehan miroveke gelekî zarîf, narîn bû, ji aliyê fîzîkî ve zehmetî bikişanda jî ji aliyê fikrî têdikoşiya û hewl dida vê yekê ji holê rake.”
‘SERKETINA WÊ YA LI NAVA KAR Û SERKETINA WÊ YA LI NAVA JIYANÊ DI NAVA AHENGIYÊ DE BÛ’
Sînem Adali diyar kir ku piştî 4-5 salan li Herêmên Parastinê yên Medyayê ew careke din li hev rast hatin û bal kişand ser dîsîplîna Tara ya di rojnamevaniyê de ye: “Wê demê li Herêmên Parastinê yên Medyayê rojnamevanî dikir. Ez jî ji qadeke cuda ya kar hatibûm. Di çapemeniyê de gelekî lez klavye bi kar dianî, li ser karê çapemeniyê serwer bû, xwedî performanseke kar a bi dîsîplîn bû.”
Adali diyar kir ku Gulistan Tara jê xwest, ku derbasî karên çapemeniyê bibe, ev daxwaza xwe ji saziya xwe re jî ragihand û got, “Ez jî qanih bûm û min biryar da ku pê re bixebitim. Sekn, tevlîbûn û rêbaza wê ya li nava kar gelekî bi fedakarî bû. Ti carî ne got, ez ê vê bikim, hûn jî vê bikin. Bi hesab nebû, barê hevalên xwe hildigirt, hewl dida tevkariyê li hevalên xwe bike, jiyan parve dikir, xemgînî, kêfxweşî, hestên xwe parve dikir. Lewma serketina wê ya di nava kar û di nava jiyanê de di nava ahengiyê de bû.”
‘DI NAVA ÇAPEMENIYÊ DE LI HEMBERÎ NÊRÎN Û FERASETA ZAYENDÎPERESTIYÊ TÊDIKOŞIYA’
Sînem Adali destnîşan kir ku Tara di nava karê çapemeniyê de li hemberî nêzîkatiyên serwer sekneke bi biryar nîşan da û got, “Di çapemeniyê de li dijî nêrînên ji nêzîkatiyên bi serweriya mêr û zayendîperestiyê têdikoşiya. Dema ku ev dikir bi rengekî hişk û nezantî nedikir; bi sekna xwe ev yek nîşan dida û bandor li derdora xwe dikir. Ji ber vê yekê wê timî bê bîranîn.”
Adali işaret bi bandora Tara li ser hevalên xwe kir û got, “Ji ber vê yekê şehadeta wê ji bo me windahiyeke cidî ye. Ji bo dagirtina vî cihî jî divê namzetên nû yên rojnamevaniyê wê ji xwe re bikin mînak, li ser xeta wê bimeşin û kevneşopiya wê dewr werbigirin. Lewma dema ku em hevala Gulistan bi bîr tînin dilê me dişewite. Em nikarin vê yekê qebûl bikin. Ji ber ku hevaleke welê bû ku bi rastî jî divê bê bîranîn.”
‘EM Ê KEVNEŞOPIYA WAN DEWAM BIKIN, CIVAKÎ BIKIN’
Adali li gel Gulistan Tara rojnamevanên din ên şehîd bûn bi bîr anî û got, “Wê bi sedan Gulistan hebin ku di vê têkoşînê de li ser xeta wan a rojnamevaniyê bimeşin. Weke hevalên rojnamevan ên beriya wê; Seyît Evran, Azîz Koyluoglû, Gûrbetellî Ersoz û bi hezaran weke wan. Namzetên nû yên rojnamevaniyê wê li ser xeta van hevalan vê kevneşopiyê mezin bikin û tevlî vê têkoşînê bibin.”
Adali di dawiya axaftina xwe de Gulistan Tara carake din bi bîr anî û ragihand ku wê li ser xeta wê bimeşin, xeta wê mezin bikin, kevneşopiya wê ya rojnamevaniyê bigihînin nifşên nû û vê kevneşopiyê civakî bikin, rojnamevanên nû yên şoreşger biafirînin.
