Li dijî êrişên çeteyên Şamê û dewleta Tirk yên li ser Rojavayê Kurdistanê, ji aliyê Nûnertiya Rêveberiya Xweser a Bakur û Rojhilatê Sûriyeyê ya Başûr ve bi daxuyaniyek çapemeniyê bang li hêzên Başûr, Tevgera Azadiya Kurdistan û gelê Başûrê Kurdistanê hat kirin ku hêzê bişînin Rojava û piştgiriyê bidin berxwedana Rojavayê Kurdistanê.
Civîna çapemeniyê li ber Nûnertiya Rojava ya li Silêmaniyê hat lidarxistin. Nûnerê PYD’ê yê Başûr Cawîdan Kemal, Nûnerê Rêveberiya Xweser a Başûr Mihemed Ala, Nûnera Kongreya Star li Silêmaniyê Necme Eloş amade bûn. Di civîna çapemeniyê de bi zimanê Kurdî û Erebî daxuyanî hatin dayîn.
Nûnerê PYD’ê yê Başûr Cawîdan Kemal axivî û got: “Em bang li gelê Kurd dikin ku piştgiriya Rojavayê Kurdistanê bikin. Em ji gelê xwere piştrast dikin ku wê QSD şerê man û nemanê bike. Emê heta damla dawî ya xwîna xwe parastinê li Kurdistanê bikîn.”
Cawîdan Kemal da zanîn ku dijminê sereke yê Kurdan dewleta Tirk a dagirkere û ev plana êrişê ya li dijî gelê Kurd ji aliyê dewleta Tirk ve tê kirin û piştgiriya HTŞ’ê dikin.
Di dewamê de Cawîdan Kemal bang kir û got: “Em li Başûrê Kurdistanê bang li gelê xwe dikin ku hem li navxwe hem jî li dervey welat piştgiriya Rojavayê Kurdistanê bikin. Ji ber ku niha rûbirûyê komkujiya çeteyên Colanî tên. Yek armanca van çeteyan heye ewjî tinekirina gelê me ye.”
Nûnerê PYD’ê Cawîdan Kemal bang li serokatiya Herêma Kurdistanê kir ku deriyê sinorî yê Sêmalka li pêş gel veke daku ji bo piştgiriya Rojava derbas bibin.
Nûnerê PYD’ yê Başûrê Kurdistanê ev bang li hêz û gelê Başûrê Kurdistanê kir: “Em bang li Serokê PDK’ê Mesûd Barzanî, Serokê YNK’ê Bafil Talebanî û Tevgera Azadiya Kurdistanê dikin ku hêzên pêşmerge û gerîla ji bo piştgiriya Rojava bişînin. Ji berku gelê me niha şerê man û nemanê dike. Her wiha em bang li gelê xwe yê Başûrê Kurdistanê dikin ku di vê dema zehmet de dakevin ser cadeyan, li ber balyozxane û nûnertiyên welatên cîhanê kom bibin. Da ku ji hemû cîhanê re rabigihînin ku metirsiyek mezin li ser gelê me heye.”
Di dawiyê de jî Cawîdan Kemal got: “Xwesteka dijminên Kurdan tinekirina doza Kurde, lê em li vir radigihînin ku emê şerê man û nemanê bikîn û em piştrast dikin ku serkeftin ya me ye.”
