Duh li Hewlêr civînek der barê rageşiya li Sûriyeyê û rewşa li Bakur û Rojhilatê Sûriyeyê de hatibû lidarxistin. Di civînê de Masûd Barzanî, nûnerê Amerîkayê ya Sûriyeyê Tom Barack, fermandarê Giştî yê Hêzên Sûriya Demokratîk (QSD) Mazlûm Ebdî, endama Fermandariya Giştî ya QSDˊê Rohilat Efrîn, seroka Daîreya Têkiliyên Derve ya Rêveberiya Xweseriya Demokratîk a Herêma Bakur û Rojhilatê Sûriyeyê Îlham Ehmed, serokê ENKSˊê Mihemed Îsmaîl amade bûn.
Serokê hikumeta demkî ya Sûriyeyê Ehmed El Şeri beriya çend kêliyan “agirbest û entegrabûneke tevahî di navbera hikumeta Sûriyeyê û QSDˊê” ragihand.
Piştî hevdîtina Tom Barack El Şeri li Qesra Tişrînê ya Şamê di civîneke çapemeniyê de diyar kir ku diviyabû Fermandarê Giştî yê QSDˊê Mazlûm Ebû di hevdîtinê de amade bûbûya, lê ji ber rewşa hewayî ya nebaş amade nebû.
El Şeri di civîna ku çend deqeyan dirêj nekir de got: “Em gihîştin rêkeftina agirbestê û entegrabûna tevahî di navbera hikumeta Sûriyeyê û Hêzên Sûriya Demokratîk de û talîmata agirbestê da.”
El Şeri diyar kir ku ew ê pişt bi Mazlûm Ebdî re li ser hûrgilî û mekanîzmaya destpêkirina bicihanîna peymanê li hev bicivin û di bersivdana pirsên rojnamevanan de got hîna bi Ebdî re hûrgilî nehatine nîqaşkirin û nakokiyên bi QSDˊê re wê werin çareserkirin.
Piştî civînê de ajansa SANA ya hikumetê wêneya El Şerî ku di destê xwe de peymana ku ji 14 bendan di navbera her du aliyan de hatiye îmzekirin, hilda.
Bendên peymana agirbestê û entegrabûna tevahî di navbera hikumetê û QSDˊê de li gorî SANAˊyê parve kirine wiha ne:
1- Agirbesteke berfireh û yekser li hemû eniyan û xalên şer ên di navbera hêzên hikumeta Sûriyeyê û Hêzên Sûriya Demokratîk de, digel vekişîna hemû teşkîlatên leşkerî yên girêdayî “QSD” bo herêma rojhilatê Firatê wekî gaveke pêşîn ji bo ji nû ve bicihbûnê.
2- Radestkirina tavilê ya îdarî û leşkerî ya parêzgehên Dêrazorê û Reqayê bi tevahî ji hikumeta Sûriyeyê re, di nav de radestkirina hemû sazî û tesîsên sivîl. Li kêlek wê jî derxistina tavilê ya biryaran ji bo tesbîtkirina karmendên heyî yên di wezaretên peywendîdar ên dewleta Sûriyeyê de, û pabendbûna hikumetê ku zirarê nede karmend û şervanên QSDˊê û rêveberiya sivîl li her du parêzgehan.
3- Hemû saziyên sivîl ên li parêzgeha Hesekê divê di nav saziyên dewleta Sûriyeyê û sazûmaniyên wê yên îdarî de bên entegrakirin.
4- Hikumeta Sûriyê hemû deriyên sînor û zeviyên petrol û gazê yên li herêmê wergire û parastina wan ji aliyê hêzên fermî ve were dabînkirin da ku vegera çavkanî ji bo dewleta Sûriyê misoger bibe.
5- Entegrakirina hemû hêmanên leşkerî û ewlehî yên QSDˊê di nav Wezaretên Parastin û Hundirin ên Sûriyeyê de li ser bingehek takekesî piştî kontrolên ewlehiyê yên pêwîst, di heman demê de dayîna pileyên leşkerî û mafên materyal û lojîstîkî yên pêwîst ji wan re, tevî parastina taybetmendiyên herêmên Kurdî.
6- Fermandariya QSDˊê pabend e ku bermahiyên rejîma berê nexe nav refên xwe û lîsteyên efserên ji bermahiyên rejîma berê yên ku li deverên Bakur û Rojhilatê Sûriyeyê hene, radest bike.
7- Derxistina biryara serokatiyê ji bo tayînkirina namzetiya parêzgeha Hesekê weke garantiya beşdariya siyasî û temsîlkirina xwecihî.
8- Bajarê Kobanê/Ayn El Ereb dê ji çekên leşkerî yên giran were paqijkirin, hêzek ewlehiyê dê ji niştecihên bajêr were damezrandin, û hêzek polîsên herêmî dê di bin desthilata îdarî ya Wezareta Hundirîn a Sûriyeyê de bimîne.
9- Rêveberiya berpirsiyarê dosyaya girtiyên DAIŞ’ê û kampan, ji bilî hêzên berpirsiyarê parastina van tesîsan, dê bi hikumeta Sûriyeyê re werin yekkirin, da ku hikumeta Sûriyeyê berpirsiyariya tevahî ya yasayî û ewlehiyê ji bo wan bigire ser xwe.
10- Pejirandina lîsteyek ji fermandariyên namzedkirî ku ji hêla fermandariya QSDˊê ve hatine pêşkêşkirin da ku cihên payebilind ên leşkerî, ewlehî û sivîl di sazûmaniya dewleta navendî de dagirin da ku hevkariya neteweyî were misogerkirin.
11- Pêşwazîkirina biryara Serokatiyê ya Hejmar 13ˊan a 2026ˊan, ku mafên çandî û zimanî yên Kurdî nas dike, û pirsgirêkên yasayî û sivîl ên kesên neqeydkirî (mektûm) çareser dike û mafên milkê yên ji peymanên berê berhevkirî vedigerîne.
12- QSDˊê pabend e ku hemû fermandar û endamên Partiya Karkerên Kurdistanê (PKK) yên ne-Sûriyeyî ji sînorên Komara Erebî ya Sûriyeyê derxe da ku serwerî û aramiya cîranê misoger bike.
13- Dewleta Sûriyê pabend e ku wekî endamek çalak ê Hevpeymaniya Navneteweyî, bi hevkariya Dewletên Yekbûyî yên Amerîkayê (DYA) re ji bo misogerkirina ewlehî û aramiya herêmê, şerê li dijî terorîzmê (DAIŞ) bidomîne.
14- Ji bo gihîştina lihevkirinên der barê vegera ewle û bi rûmet a xelkê Efrîn û Şêxmeqsûdê ji bo deverên wan, kar tê kirin.
Ev ragihandin li gel rageşiya leşkerî ya berdewam li gelek herêmên Bakur û Rojhilatê Sûriyeyê, di nava şopandina gavên bicihbûnê û zelalbûna fermî ji aliyên eleqedar ve li ser mekanîzmayên bicihanîna rêkeftinê li ser erdê, pêk hat.
