Alozî û bûyerên ku çend roj in di navbera hêzên girêdayî PDK’ê û gelê gundê Lacan ê li ser sînorê Hewlêrê de didomin, tund bûne. Hêzeke girêdayî PDK’ê ku nêzî 5 hezar kes e, bi siwareyên zirxî yên mîna tankan û bi çekên modern li ser gundê Lacanê de girtin. Piştî serdegirtinê, gund bi tevahî hatiye dorpêçkirin û tê gotin ku gundî neçarî koçberiyê tên kirin.
PIRSGIRÊKÊ ÇAWA DEST PÊ KIR?
Li gor agahiyên ku Rojnewsê ji gundiyan bi dest xistine, gelê Lacanê ku ji nêzî 250 malan pêk tê û piraniya wan ji eşîra Herkî ne, bi nêzîkbûna xwe ya bi PDK’ê ve tê zanîn. Beriya hilbijartinan, nûnerê PDK’ê Berzan Qesab serdana gund kiribû û ji gundiyan daxwaza deng kiribû; soz dabû ku daxwazên wan piştî hilbijartinan bên bicihanîn û di şîrketan de kar bidin wan. Li ser vê yekê, gundiyan 124 tankerên veguhastinê kirîn, lê PDK’ê sozên xwe bi cih neanî.
Gundî ji bo ku bizanibin ka bê daxwazên wan çawa çareser dibin, çûn ber deriyê Şîrketa Lanaz. Dema ku rayedarê şîrketê got, “Ez li ser gora Mela Mistefa sond dixwim ku daxwazên we bi cih neynim,” alozî zêde bû. Gundiyan jî li hemberî van gotinan, bi gotina “Em li ser gora Mihê sond dixwin ku em ê destûrê nedin hûn kar bikin” bersiv dan. Alozî di vê xalê de zêde bû.
Piştî ku gundiyekî ku ji medyayê re axivî ji aliyê PDK’ê ve hate girtin, gel bertek nîşan da; piştre hate ragihandin ku sivîlek hatiye kuştin û 10 sivîl jî birîndar bûne.
ZÊDETIRÎ 5 HEZAR HÊZÊN PDK’Ê GUND DORPÊÇ KIRIN
Hêzên PDK’ê sê roj in gundê Lacanê bi zêdeyî 5 hezar leşkeran dorpêç kirine. Derketin û ketina gund bi tevahî ketiye bin kontrolê; tê gotin ku destûr nayê dayîn nexweşên giran jî ji bo tedawiyê biçin nexweşxaneyê. Tê diyarkirin ku gelek gundî bi zorê bo herêmên din hatine birin.
ŞÎRKETA LANAZ YA KÎ YE?
Şîrketa Lanaz a ku xwemalî malbata Barzanî ye, bi salan e li ser axa gundê Lacanê kar dike. Tê gotin ku şîrket xwemalî Mensûr Barzanî û kurê wî ye. Li gorî hin çavkaniyan, şîrket rasterast bi şîrketên zavayê Serokkomarê Tirkiyeyê Erdogan û kurê wî Bîlal Erdogan re dixebite.
Tê ragihandin ku piraniya xebatkarên şîrketê Tirk in, mehane 1500-2500 dolar distînin; lê ji xebatkarên Başûrî re 500 dolar tê dayîn. Tê gotin ku li dijî gundiyên ku daxwaza zêdekirina meaşên xwe kirine, karkerên ji derve bi mûçeyên kêmtir hatine anîn, ev jî nerazîbûn zêdetir kiriye.
Tê gotin ku şîrketê li herêmê zerareke mezin daye hawîrdor û tenduristiya mirovan, zêdebûna nexweşiyên penceşêrê, çav û rêyên nefesê hatiye dîtin.
NÊZÎKATIYA PDK’Ê Û PAŞPERDEYA ŞERÊ BI EŞÎRÊN BEHDÎNAN RE
Tê destnîşankirin ku di navbera eşîrên Behdînan bi taybetî eşîra Herkî– û PDK’ê de dîrokeke dirêj a pevçûnê heye. Gundiyekî Lacanê dibêje, PDK dixwaze eşîra Herkî bi siyaseta dabeşkirin û birêvebirinê qels bike.
Li gorî çavkaniyan, rêyên bazirganiya enerjiyê yên di navbera malbata Barzanî û malbata Erdogan de qada petrolê ya Xurmele, beşek ji boriya gaza xwezayî, Şîrketa Lanaz, xeta petrolê ya Hewlêr-Duhok û projeyên din ên mezin di herêma Herkî re derbas dibin. Ji ber vê yekê, berxwedana li gundê Lacanê rasterast bandorê li ser berjewendiyên PDK û malbata Barzanî dike.
Hate piştrastkirin ku zêdeyî 5 hezar leşkerên PDK’ê li gund û derdora wê hatine bicihkirin, dest bi valakirina gundiyan hatiye kirin û hin ciwan jî hatine girtin.
LEŞKERÊN GULANÊ DI FERMANDARIYÊ DE CIH DIGIRIN
Hate gotin ku hêzên ku zextê li gundiyan dikin, Hêza 1. a girêdayî Leşkerên Gulanê ne ku rasterast di bin fermandariya Mensûr Barzanî de ne. Ev hêz, di sala 2014’an de bi vekirina deriyên Şengalê ji bo çeteyên DAÎŞ’ê û terkkirina Êzidiyan ji qirkirinê re jî tê bibîranîn.
Hêzên ewlehî, parastin û rewşa awarte yên PDK’ê jî veguhestin herêmê. Li hundir û derdora gund çar kontrolgeh hatin avakirin û tevgera gundiyan bi tevahî hate qedexekirin. Hate ragihandin ku destûr nayê dayîn nexweşan jî bibin nexweşxaneyê.
Li gorî çavkaniyekî, daxwaza gundiyekî Lacanê ya ji bo birina jina wî ya ducanî bo tedawiyê li Hewlêrê hatiye redkirin. Heman çavkanî diyar kir ku dayikek ku ji girtina kurê xwe tirsiyaye, felc bûye, lê hêzên PDK’ê destûr nedane jina felçbûyî bibin nexweşxaneyê.
