Piştî ku pergala rejîma Esad hat rûxandin û rejîma nû hat ser desthilatdariya Sûriyeyê, gelek guhertin çêbûn. Lê belê hin ji wan guhertinan metirsiyekê ji gel re ava dike û jiyana wan dike hedef. Bi taybet di vê rewşê de mafê jinan mafê tê xwarin.
Di vê çarçoveyê de Cîgira Hevserokatiya Meclîsa Sûriyeya Demokratîk (MSD) Canda Mihemed ji ajansa me ANF’ê re axivî.
Canda Mihemed di destpêka axaftina xwe de diyar kir ku di van geşedanan de pêwîste nêrîn bibin yek û wiha pêde çû: “Em di rewşekê de derbas dibin ku pêwîstiya me bi panel û komxebatan heye da ku em nêrînên hemû pêkhateyan di nav de guhdar bikin û em çareseriyên nû ji vê rewşê re bibînin. Bi taybet bi ketina rejîma Baas a ku zêdetirî 50 salî hukmê xwe yê dîktator li ser Sûriyeyê meşand, em gelek guhertinan dibînin. Ev guhertin hem ji aliyê neyînî û hem jî ji aliyê erênî ve ne. Dema em dibêjin rejîma dîktator a Baas hat ruxandin kêfxweşiya me ew bû ku em ji wê sîstema qirêj xilas bûn û êdî wê gelê Sûriyeyê ber bi azadiyê ve biçe. Lê belê niha di vê demê de em dibînin ev hikumeta nû ya Sûriyeyê dixwaze car din vê sîstema qirêj dubare bike û xwe li ser giştî pêkhateyên Sûriyeyê ferz bike.”
‘PÊWÎSTE MAFÊ HER NETEWEYÎ PARASTÎ BE’
Canda Mihemed diyar kir ku di dema rejîmê de netewên di Sûriyeyê de ne xwedî maf bûn û her cûreyên êşkence li ser wan dihat meşandin û got: “Ji ber vê yekê em di vê Sûriyeya nû de naxwazin ku ev pergal car din xwe dûbare bike. Wek ku tê zanîn jî li Sûriyeyê gelek ol û bawerî hene. Berî niha li Sûriyeyê sîstemek navendî dihat meşandin û ji bilî netewa Ereb ti netewên din nedihatin qebûlkirin.
Piştî vê rewşê jî bûyerên nû destpê kirin û em niha di pêvajoyek pir giring de derbas dibin û pêwîste di vê pêvajoyê de tevahî partiyên siyasî berjewendiyên xwe deynin aliyekî û di vê qonaxê de çavê xwe vekin. Rastî ev hikumeta nû ya Sûriyeyê hin gavên ku diavêje li cem me metirsiyekê çêdike, ji ber wek herêma Bakur û Rojhilatê Sûriyeyê keda me mezin e û me gel ji sitemkariya çeteyan xilas kir. Her wiha me ev herêm bi taybet kir herêmek azad û hemû netew tê de dikarin jiyana xwe bi hev re dewam bikin. Lê metirsiya me ji gavên vê hikûmetê re ew e ku naxwaze nêrînên tevahî gelan li ser diyalogek nû çêbibe û cihê wan jî di konferansê xwe de çêbike. Ji ber ku nêrîna netew û gelan ji bo avakirina diyalogek nû ya Sûriyeyê pir girîng e.”
‘WÊ JIN CIHÊ XWE DI HER QADA CIVAKÎ Û LEŞKERÎ DE BIGIRE’
Canda Mihemed wiha behsa mafên jinan kir û got: “Em di vê rewşê de her tim van civînên gel lidar dixin da ku nêrînên xwe bînin ser ziman û ev helwest jî bigihije tevahî welatên cîhanî. Her wiha pêwîste em bi gavên ku tên avêtin re alîkar bin. Tişta herî herî ku di vê rewşê dewere parastin, mafê jin e. Mafê jin di vê pêvajoyê de pêwîste were dewamkirin, di destûra nû ya Sûriyeyê de jî mafê jin ji her aliyê ve divê were nivîsandin. Pêwîste jin di milê siyasî û leşkerî de xwedî erkek herî mezin be. Di dirêjahiya salan de jinê di van qadan de cih girt û ji tevahî jinên cîhanê re bû mînak. Jinên Kurd parastina mafê giştî jinên Sûriyeyê dike. Em wek jinên Herêma Bakur û Rojhilatê Sûriyeyê dixwazin Sûriyeyek nenavendî were avakirin ku têde mafê her kesî were parastin û ji bo tevahî gelan bibe hêz da ku kes nekaribe wan bindest bike.
Bi xwînrijandinê tiştek çareser nabe. Lê belê dê ev şer bi xwe re gelek ziraran bîne. Ev dem ne dema şerê çekdarî ye, lê belê bi diyalogê wê her tişt çareser bibe, divê hikumeta nû ya Sûriyeyê van kesên biyanî ji xaka Sûriyeyê derxîne û rêveberiyek baş ji gelan re pêşkêş bike. Mînak wek dewleta Tirk a dagirker ku ti mafê wî nîne derbasî xaka Sûriyeyê bibe. Em vê yekê qebûl nakin pêwîste hemû xaka ku ji aliyê çeteyên dewleta Tirk ve hatine dagirkirin, bên rizgarkirin.”
