Di Pêvajoya Aştî û Civaka Demokratîk de mîsogerkirina nasnameya Kurd a di destûra bingehîn de, li Tirkiyeyê weke yek ji sernavên esas a çareseriya demokratîk û mayînde derdikeve pêş. Têkildarî mijarê Alîkara Hevserokatiya Giştî ya Partiya Herêmên Demokratîk (DBP) Narîn Gezgor ji ajansa me re axivî.
Narîn Gezgor bal kişand ser şert û mercên dîrokî yên banga Rêber Apo ya 27’ê Sibatê û diyar kir ku Rojhilata Navîn rû bi rûyê şer e, di demeke wiha de stratejiyeke têkoşînê ya nû tê rojevê.
Narîn Gezgor bilêv kir ku banga Rêber Apo ya 27’ê Sibatê û guhertina stratejiya têkoşîna azadiyê, ji bo gelên Tirkiye û Rojhilata Navîn gaveke girîng a dîrokî ye û got, “Entegrasyona demokratîk li seranserî welêt nasname û baweriyên cuda jî digire nava xwe. Bersiva siyaseta demokratîk, komara demokratîk e. Ji bo demokratîkbûna komarê divê destpêkê sîstema hiqûqê ya li ser esasê mantiqê dewletparêzî û yekperestiyê were guhertin. Aştî bi xwe bi çareseriyê dibe. Ji bo çareserî pêk were jî, divê cudahî bên naskirin. Rêber Apo ji destpêka pêvajoyê ve bê navber li ser vê mijarê disekine. Hiqûqa demokratîk û pozîtîf weke şertê esas ê entegrasyona demokratîk dinirxîne.”
‘DIVÊ RASTIYA KURDÊN BI ZAGONA BINGEHÎN A 1924’AN HATIYE ÎNKARKIRIN, WERE NASKIRIN’
Narîn Gezgor bi bîr xist ku Têkoşîna Azadiyê ya Kurd di dîrokê de weke têkoşîna azadiyê û hebûnê ya gelekî tê înkarkirin, derket holê û ev tişt got, “Dema em li Têkoşîna Azadiyê ya Kurd dinêrin, em dibînin ka li ser kîjan esasan derketiye holê. Li ser esasê rastiya gelekî ku hebûna wê tê înkarkirin, derket holê. Divê rastiya Kurdên bi zagona bingehîna 1924’an hatiye înkarkirin, were naskirin. Di qonaxa niha de têkoşîna me ne tenê ji bo gelê Kurd e, ji bo azadiya hemû gelên li Tirkiyeyê ye. Lewma divê dest ji zihniyeta yekperest were berdan.”
‘KURDÎ DIVÊ BIBE ZIMANÊ FERMÎ’
Narîn Gezgor destnîşan kir ku Kurdî divê bigihije statuya qanûnî û zagona bingehîn, ev di aliyê demokratîkbûnê de pêwîstiyeke esas e û got, mafên ziman û çand divê tenê di asta gotinê de nemîne, ji saziyên dewletê heta qadên civakî û Meclîsê di hemû qadên jiyanê de were naskirin.
Narîn Gezgor got, “Li Tirkiyeyê ji bo pêvajoya demokratîk pêş bikeve û bi aştiyeke rasteqîn bi encam bibe, yek ji şertên sereke ew e ku Rêber Apo ji mafê hêviyê sûd werbigire û azad bibe.”
Narîn Gezgor îfade kir ku demokratîkbûn divê di hemû qadên jiyana civakî û siyasî de bi gavên şênber pêş bikeve û destnîşan kir ku divê dawî li qeyiman jî were.
Narîn Gezgor anî ziman ku çareseriya demokratîk a pirsgirêka Kurd bi mîsogerkirina nasname, çand û zimanê Kurdî ya di destûra bingehîn de dibe.
